維城歷史與藝術交融

琴晚Tracy約我今日去影相，本來唸住去馬鞍山村，不過天氣真係麻麻哋又大霧又落雨，本來唸住唔出街，但係又好似好浪費一日假期，所以決定另選地方！點知俾我上網揾到個好地方，就係荷李活道舊警察宿舍，亦即係前中央書院遺址。
以前細個家住北角，阿婆住堅道，好多時上阿婆屋企都會經過中區一啲舊樓再行條斜路上去，而荷李活道警察宿舍亦都係其中一個曾經熟口熟面嘅地方。一個以為會清拆重建嘅地方，經過民間三年來爭取，行政長官曾蔭權响施政報告中正式宣布將呢塊土地永久剔出勾地表，以作日後發展創意產業同教育之用。而其間古物古蹟辦事處更進行地下發掘，發現前中央書院嘅遺址...
第一次同Tracy出嚟影相，估唔到佢又係DSLR嘅狂熱份子，大家都係新手，所以都係亂影一餐。今次呢個開放日，有好多藝術團體响一啲空置嘅單位做咗一啲展覽同裝置藝術，所以特別多嘢影...
之後我哋暢遊中區，行吓石板街同中區警署，又係一個小時候成日到嘅地方，媽咪做警察嗰陣响中區警署守過，有時候會帶我同阿哥入去，最記得有隻識講"Hello"嘅鸚鵡！趣怪趣怪！

童心、童真、童話

今晚收夜，放工搭車揀咗坐响對母子嘅前面，小朋友大概三、四歲，以下係佢哋嘅對話...
囝囝:媽咪呀，點解啲巴士响度覺豬嘅？
媽咪:因為依家係夜晚，要覺豬囉！
囝囝:哦...好似我咁要覺豬係咪呀？
媽咪:係呀！今晚睇咗咁多車車，陣間返到屋企冲完涼就要乖乖哋上床覺豬喇！
囝囝:知道！
媽咪:睇吓幾多Airbus通天巴士！
囝囝:媽咪，乜嘢叫做通天巴士呀？
媽咪:...(靜咗，因為唔知點答好...)
我心唸:哈！個腦即時响度唸究竟點答好...
媽咪:...通天巴士係呢架巴士個名囉！
囝囝:哦...
架巴士經過小蠔灣巴士廠...
囝囝:嘩!好多巴响嗰度覺豬呀媽咪！點解响嗰度覺豬嘅？
媽咪:度係巴士嘅屋企嚟！
我心唸:又係喎！
跟住有好多車都開得快過我哋架車...
囝囝:嘩！點解啲車車開得咁快嘅媽咪？
媽咪:因為嗰啲車車食飽飽電油囉！
我心唸:嘩,咁答都得？
媽咪:我哋架車車肚餓咪行得慢囉！
囝囝:你睇吓嗰架車咁慢，梗係唔飽啦！...
****************************************************
以上嘅對話係咪好搞笑？我上車連歌都唔聽，就係因為呢個小朋友囉...

兒童世界嘅天真同單純，同成年人嘅世界截然不同...
感受到嗎？

好記得有一次响樓下，又有另一對父女嘅對話...
囡囡:爹哋，我今日好開心！
爹哋:點解呀？
囡囡:因為今日唔駛返學囉！

好簡單好直接...小朋友好容易就開心，相反成年人就...

有時候我想自己係一個幼稚園老師...

我是...

最近Facebook流行一啲tag朋友嘅遊戲，早期係寫一大篇文章嚟敍述自己十六個特點，再三十二甚至六十樣關於自己嘅嘢，遊戲意義同規則如下~
請花一點時間，不要嫌麻煩，它可以使你了解你身邊的朋友更多...更多...把以下問題複製，貼在一封你要tag 的 notes 上。將所有的答案改成你自己的，然後tag 給你認識的人，包括將這封信寄給你的人。
這個理論要說的是，你將了解你的朋友許多不為人知的種種......
就係咁我久唔久我都會俾人tag吓，由於我懶所以唔會花時間去寫，要寫都寫吓自己個blog先啦，事關仲有好多過去發生嘅事情未寫好！
點解我要响度提呢樣嘢？就係最新嘅tag人遊戲已經進化到响一幅圖度有廿幾種人物，再响嗰啲人物上tag自己嘅朋友.....超方便！事關唔駛寫咁多嘢先啦！
又想講吓，到現時為止，個個都tag我話我係photographer！真係承讓承讓，我只係個九流亂影一通嘅女子，並非photographer呀！無論如何，多謝欣賞我啲垃圾相！

兒童王國燒烤樂

上星期某日，收到Connie嘅email問我得唔得閒去佢屋企樓下會所BBQ，幫佢大仔成班同學仔影相，最鍾意小朋友嘅我，立刻望吓個更，Yeah！放假！就即刻應承咗！
今日天公做美，陽光普照藍天白雲，仲有啲炎夏嘅感覺，心情都份外愉快！同咁多小朋友BBQ真係第一次，當然我會盡我所能，影低佢哋最天真嘅一面啦！一開始未人齊所以誠誠、琪琪同皓軒三個小淘氣都响自己個杯度寫名，皓軒仲幫我寫埋添，不過佢未識寫姐姐呢個字，琪琪媽咪好耐次咁教佢寫~得咗！等到啲小朋友嚟到八八九九，各媽咪就忙住為自己嘅小朋友吉嘢食去燒！好得意個個都係燒腸腸，個個小朋友都好全神貫注咁望住自己燒嗰條腸腸！有趣、有趣！同小朋友影相真係好難，事關佢哋唔會乖乖企啲度又或者面向住你俾你影，燒咗一陣，一個二個就走咗去玩喇，而我就梗係跟住佢哋啦！玩咗一陣，Connie嘅一對小孖仔覺完豬落嚟，兩個個樣仲好似瞓緊覺咁，好搞笑呢！最搞笑莫過於我被困响欄杆入面，佢哋一隻二隻馬騮仔話唔俾Wing姐姐出嚟，話入咗去就唔准走喎，仲守住兩邊唔俾過不突止，仲同我玩呯呯槍...我要俾反應o架！...扮中槍囉... 真搞笑！到影大合照時至攞命，需時10-15分鐘去捉返自己嘅囝囝囡囡，終於人齊...但係唔會個個都望鏡頭...激死姐姐！所以决定用連環快拍..但係冇一張係個個望實囉！
臨走時，成班小朋友同我講"多謝Wing姐姐幫我哋影相相！"聽到都甜到漏！...
在一個晴朗的下午，遇上可愛的一羣，走進兒童國度，跟他們追、跑、跳、笑；童真童真...我愛童真更愛他們天真無邪的笑聲...多謝Connie，俾個機會我感受童真...

Beauties Vs Little Prince

今日相約Margaret同Esther去探Maranda同佢個寶貝，由於上個禮拜我單拖上過去睇佢，今次係純粹陪兩位美人上去，同埋幫BB影啲相，佢哋兩公婆叫我多啲上去同佢個仔影相喎，哈哈，竟然有人欣賞我影啲相。BB個樣冇乜點變，仍然係鍾意瞓同食，所以幫佢影親啲相都係瞓咗覺...激死！BB,Wing姐姐下次上嚟唔好又响度瞓覺呀！

亂逛。亂影。亂闖

今天百無鳥賴，决定幫豺狼R配返個抽濕機個Parts，送貨到新蒲岡俾佢，算唔話得啦！順便埋封利市請我食埋飯就啱晒！之後又走上熟識的路線，到尖沙咀坐船過中環，跟住搭咗架巴士入赤柱！上咗巴士無幾耐，突然有一張熟識嘅面孔同我打招呼，原來係劉太，亦即係我個御用牙醫劉醫生嘅太太，湊仔放學返赤柱大屋，真佩服劉太相夫教子事事親力親為！
去到赤柱第一件事就係去鐵皮屋食返件西多士，為我之後暢遊赤柱嘅能量做儲備。入到赤柱，梗係要揾吓PamPam啦，點知佢又响屋企，順理成章我嘅晚飯又有著落喇！基本上赤柱呢個地方都嚟過好多次，但認真攞住部相機嚟影就係第一次！自己一個四周圍行，行入軍人墳塲沿海邊嗰條路，望落海邊突然發覺有個傻佬冇著衫企响海邊舊石向我揮手，不突止仲將佢條小弟弟响度fing，好得意忘形咁，亦好自我陶醉真搞笑！見完啲咁搞笑嘅嘢之後，當然繼續行啦，去完墳塲跳咗上架巴士，唸住去赤柱炮台睇吓有乜嘢睇，點知係得一個迴旋處咁多，我問司機叔叔有乜睇，佢竟然話冇，仲話之前好多人都好似我咁，以為有嘢睇搭車上嚟，最後都係空手而回！司機叔叔仲好好人，唔駛我俾錢，車埋我落赤柱大街，十萬個唔該呀。
差不多時候又係要闖入PamPam屋企~赤柱監獄嘅職員宿舍，一出門，小Bosco已經開定門等我，So sweet啦！仲有佢隻芝娃娃，Pam話佢老公幫隻狗改個名叫惠美？？！！吓？葉惠美？咁搞笑？不過佢叫惠美做阿Bo，又或者Bobo！响Pam屋企同Bosco玩咗一陣，食飽飽同Pam傾吓計，感覺寫意，今日亦是充實的一天...

難關

全球經濟衰退，似乎無一幸免，公司早响上年年尾已經實行多種減省開資嘅行動，由二月一日起，Management grade每個月要放三日no pay leave，另外No day off/Split Allowance都相繼減咗好多。Cut O/T呢家嘢就變成我哋Real Time每日嘅例行動作，老細話至緊要狠，查實我哋都cut得好狠！今日老細召晒我哋入房，俾我哋睇吓過往嘅業績，今日開完會大老細話將各部門嘅head count減少都仲唔夠，仲會炒緊啲表現差嘅同事(一早就應該啦！)最欣慰嘅就係大老細終於知道我哋嘅power，事關上星期加八十幾班機，而我哋仲將Airside俾出嘅O/T減少咗18%，令到佢哋有少少喜出望外，而我老板亦讚我哋做得好，再加多句仲要狠啲！好...再狠啲囉！