回到啓德時代

今晚參加咗一個好特別嘅聚會，就係同一班啓德時代嘅BA team聚一聚，當中只有數得出嘅三個仲响渣甸做，其中一個當然係我啦！其他已經各散東西，有啲名我都唔記得，淨係認得出好熟口面，不過一講起阿邊個邊個就會"哦"一聲，記得返晒！話時話Jory真係好勁，揀咗一個好地方俾我哋聚，又揾到咁多人出嚟，真係好多謝佢！其實今次嗰party係BA team check-in counter同事嘅聚會，查實我又唔係做過check-in counter，只不過係做過BA嘅CSA三個月咁大把，Jory話係BA team就歡迎，我就唔客氣，一齊去懷念一番過往趣事！回憶吓當年三大BA PDO嘅威水史...哈哈！咸旦黄，你都係冇變過，一樣係咁風趣！希望遲啲又可以出嚟聚一聚啦！

生日禮物

生日禮物呢個話題，其實應該响琴日講吓，就係因為冇收過禮物，所以有嘢好講！不過我唔係因為冇人送禮物俾我而覺得慘，人大咗反而唔會咁著重禮物呢樣嘢，朋友同我食餐飯，講句生日快樂，都已經開心到震！今個生日好想得到，等咗好耐亦講咗好耐要買嘅單鏡反光機，終於揾到個藉口俾自己去行動，就係買俾自己做生日禮物。近兩個月都有留意各大牌子嘅相機性能同比較，加上徵詢咗朋友嘅意見，結果今日收工拿拿林去買起佢~ Sony A350嘅body再加一支Tamron A16，呵呵，開心到爆，由中學時代攞我老豆部菲林單鏡反光機同同學周圍影，到出嚟做嘢自己買部Sony DC -P5，再進化買Panasonic DC FX50，繼而再高級少少買部Ricoh GX200用嚟旁身，随時攞出嚟影，令我對攝影呢門學問結下不解之緣，小女子就响各方好友鼓勵下，再加埋自己追求滿足感嘅駒使下收養咗部DSLR，成為一個亂影一通卻偶然拍到一張精彩靚相嘅扮攝影師！哈哈！可喜可賀...下面張相就係我部A350嘅第一張作品喇！

床上的生辰

今日十二月十四日是星期天，亦是晴朗的星期天，再講就係本小姐誕辰。病菌將我綁住响張床度，咁多年嚟都未試過生日冇出過屋企門口，可想而知我個病有幾重...瞓吓起吓身上吓網...不繼循環咁做咗好幾次至等到食飯，最搞鬼就係仲要打邊爐添，十個冇胃口都要食啲啦！多謝媽咪爸爸為我準備呢餐豐富晚餐...我仲飲咗罐可樂都冇人發覺，呵呵！多謝阿哥買咗個cake我食，响呢個咁冇色彩嘅生日，加返小小甜意！最意外嘅係响FB收到至少三分一朋友嘅祝福，實在有點感動呢！响呢度我要多謝各方好友用唔同方式俾我嘅祝福，多謝送蛋糕我食嘅同事友好~~承蒙厚意，萬心感謝！

富貴私房菜

期待已久嘅富貴夜宴，終於等到喇！點解揀呢日？一嚟星期六，二嚟就係同我仲有Kelvin一齊慶生辰！有啲阻滯就係小女子病到七彩，差少少就頂唔順食唔到呢餐...好彩我意智堅定，本住條命點都要食埋呢餐至算！臨去Alfree屋企，响青衣城睇第二次醫生，攞定藥食完呢餐至開始食！
Daddy(打保齡嗰個Daddy呀！)幾日前已經浸定遼嵾，炆定花膠魚翅鮑魚，今日仲晨早叫Gary去佢屋企接佢，到Alfree屋企準備佳餚！真係唔話得！我哋四點幾五點上到去，咁啱日落，見到個黄昏靚到不得了，拿拿林攞部相機出嚟狂影...睇過都話正响呢個等食期間，我同豺狼R响到周圍影，真係超搞笑，原本死得半條命嘅我突然生猛起嚟！由於佢老婆唔舒服，都冇眼睇我哋响度搞搞震！終於等到開餐...頭炮有南乳焗雞翼，跟住唔好嘥咁食埋啲雞湯翅嘅湯渣之後，主菜出塲~~日本頂級25頭吉品鮑，嘩!糖心！再嚟主菜~關東40頭遼嵾伴花膠公扒‧鮑汁扣鵝掌，繼而半塲休息一陣，再嚟薑葱焗澳洲膏蟹同SoSo秘製生炒骨，條清蒸老虎斑出嚟嘅時候，我哋已經飽到不得了，仲有吉品鮑魚汁濃湯雞煲翅都未食，要抖十五分鐘至完成成個晚餐！不過都仲未圓滿，再嚟壓軸甜品~愛妃極品朱古力慕絲蛋糕！大功告成！多謝Daddy為我哋準備同製作呢餐富貴宴，多謝Gary伉儷借出地方俾我哋共享呢餐佳餚，多謝各位嘅祝福，我心滿意足，別無他求...安樂返屋企大覺瞓...一流！

飯局

適逢今個月係我生日，又係琛哥生日，所以約咗幾個好友去尖沙咀妹記食餐勁！話時話自己病都冇戒口住，點到食多兩日至好好休餐！我哋呢幾個識咗十幾年，近幾年都係有喜慶同大節日至會聚首一堂，當然唔係得四、五個啦！拖男帶女至少三十幾四十人，都算陣容頂盛！不過今晚低調啲幾個一齊食餐飯，傾吓計都一樂也！仲有要多謝佢哋嘅生日祝福，簡單的一餐晚飯，不需要堂黃華麗的環境，亦無需要珍餚，有你你你你這好友...病住嚟食都抵返晒！

清新。茶聚

好耐都冇特登約個朋友出嚟食個Tea傾吓計，今日放早又可以把握呢個良機去聚一聚。大家見面唔多，久唔久佢都會打俾我吹吓水，知道吓大家近況！朋友的確好多，之前講過好朋友唔駛日日見，時時講電話，久唔久聚一聚確實有清新感覺，就是喜歡呢種感覺！就好似餐枱棵咁青綠嘅小盆栽一樣...

進步

話說小女子都有一段頗長嘅時間冇進步過，講緊乜呢？之唔係我最愛嘅保齡球運動...打波對我嚟講，真係講感覺，叫我睇邊點打，企响邊度打，確實有啲虛無飄渺，所以好多時都係激死Daddy！不過今晚有啲返常，就係打出超水準，三個字~冇得彈！一個唔覺意仲俾我攞咗本週女子最佳進步獎添！嚟個大發雌威！哈哈！上週抽到個波，今週又有獎攞，還得神落咯！