力量

舊生會藉住校慶二十週年，响學校禮堂搞咗個buffet dinner，基本上係志在返學校聚舊同懷緬一返，估唔到我哋嗰屆嘅人丁單薄得咁緊要，啲舊生會委員話我哋嗰屆係最難揾，其實又唔係吖！至少我哋都仲好捧塲，返嚟支持吓啲師弟師妹吖！我唸佢哋都係第一次搞咁大型嘅聚餐，所以少不免都有啲唔完善嘅地方，簡單講吓啲食物，簡直係不能接受，以入塲費二佰大元嚟計，冇理由會咁差；所以作為大師兄師姐嘅我哋，都俾咗小小意見佢哋，希望下次可以搞得好啲！
所謂團結就係力量，我覺得我哋一班响體藝畢業嘅同學，對學校超有歸宿感，而且極之團結，就好似用餐時，我哋一班人唔駛出聲都會分工合作，攞食物飲品返枱一齊食，仲招呼埋阿Sir添，發揮晒團結嘅精神！
晚會入面請咗歷屆校長返嚟，Miss Chan响我嘅年代仲係教緊我最鐘意嘅Geography，成十幾年冇見，唔記得我個名，都仲記得曾經教過我，真係好記性，其實我想話佢知，我好鐘意上佢嘅堂...哈哈！
嚟緊七月，學校會响馬會擺四十席，請晒所有開校以嚟嘅老師同舊生參加，我哋唸住包一圍去捧塲捧塲，呢個重任又交咗俾我，佢哋嫌我時間多定啦...

黑到爆

今日唔係黑色星期五又唔係月破日，由朝早就已經碰著黑氣，唸住上車可以瞓一覺好，點知城門隧道出口整路都唔緊要，至多行第二條路，殊不知又好似上一次咁行錯路，駛咗入一條逆線上嘅單程路，今次個司機比上次仲行多咗一倍路至發覺唔對路，想掉頭但係車身長唔夠位，駛前駛後搞咗半個鐘，仲要成架車上搭呢車返機塲返工嘅車長落晒車幫佢睇位，最後都係入後波倒後行成條街！唔該晒！又行錯路真係好搞笑囉！搞到我足足遲吐九個字至返到機塲，仲俾我影埋平時返早見唔到嘅晨曦！都算係唯一嘅得著，亦好彩今日有徙兒頂住，冇有怕！
都冇唸過啲黑氣唔散，行入洗手間第一步，我就跣到咬柴！唔係我唔小心，而係阿姐抹到個地濕晒冇整個小心地滑牌出嚟囉！會唔會係佢仲驚過我？一刻我淨係識同阿姐講好痛，之後我就用龜行嘅速度出去睇醫生，事關隻脚超腫！有人叫我投訴，不過我都冇唸過啦，人哋都係打工，我又冇乜嘢隻脚又未斷，無謂搞大啦，呢個時勢冇咗份工好慘！況且阿姐平時都好nice啦，我唸佢下次抹地會小心，亦會整返個牌出嚟啦！跣親啲客仲弊呀！

漫遊伯大尼

相信好多人對伯大尼修院(Bethanie)這名字很陌生，曾經在某本雜誌閱讀過一個專欄介紹情侶假日好去處，位處於薄扶林上面嘅一座百年歷史建築，修院於1875年由巴黎外方傳教會建成，作為傳教會士休養之所（現位於中環炮台里的香港終審法院同是 傳教會的建築物）。伯大尼修院運作百年後關閉成為政府建築物，1981年列入二級歷史建築，香港大學曾於1978年至1997年間借用伯大尼修院，後再交 還予政府產業署管理。2000年，建築署就如何善用伯大尼修院的可行性進行研究，立法會於2003年3月，批准香港演藝學院將伯大尼及隔鄰的牛棚進行復修 工程，改建作其校舍。
而今次在同事朋友的相薄中再發現這久遺了而一直想一遊的地方，决意就算單人匹馬也會獨闖。上網查閱其詳細資料，發現原來要進入建築物的內部參觀，是要先購票參加導賞團，才可進內參觀。所以急不及待在網上訂了兩張門票，一張預留給我的友人~Tracy，幸好她也感興趣陪我走一趟，還有個不速之客~Ronald呢！
早上下著微雨，還在擔心少了陽光！幸好藍天白雲走到我面前，心情也截然不同！經過導賞團的導遊帶領，講解其歷史及參觀建築物內觀，由於今天是星期六，亦是嫁娶好日子，所以小教堂被租作私人婚禮用途，只能偷偷在閣樓拍下幾張相片。隨後也在建築物外圍拍過夠...
又是盡慶的一天...炎熱一點也爽極！

我的最愛...

哈，今日响康怡間吉之島發現咗失傳咗好幾年嘅最愛....Meiji Marble Chocolate...不過係Jumbo size囉...賣189...駛唔駛咁貴呀？就係咁我就冇買到...不過皇天不負有心人，俾我响沙田間City Super發現到佢嘅pack size，即係一袋入面有瓦12小包，40蚊有找，抵啦...即刻入貨啦！
我好鐘意食朱古力，尤其係聰明豆，依家都唔見有大筒嘅聰明豆賣咯。知唔知我點食吖？就係咬晒啲糖衣至食朱古力...超正！如果你你你响街見到有Marble Chocolate，記往買俾我食呀！唸起都開心！

我愛逛超市！

今日係放大假嘅最後一日，突然多咗個任務，就係做阿四，就係幫我人攞部notebook去太古城整，亦俾咗個機會我行吓太古城嗰間日本超市APITA，入面的確係好吸引，樣樣都想買，但係要打波又唔想拎住，下次有機會再去掃貨至得...

三個人。物。誌

襯住大假嘅最後一日，約埋Tracy同Ronald去赤柱影相，Ronald繼上次同我响球塲影餐飽之後，好似上咗咁，今次叫埋佢嚟實行影餐飽加笑餐飽！其實赤柱呢個地方我已經嚟咗好幾次影相，難得Tracy想嚟又多個傻佬，加上我對赤柱呢個地方情有獨鐘，去多幾多次都冇所謂啦！
本來唸住一齊去泗益食返個午餐，去到排長龍囉，個太陽又曬到應一應，不過都誓要排隊等...仲要食飽飽就行去軍人墳塲狂影，Tracy仲帶埋本唔知乜嘢一百個外攝動作圖解，我哋就有樣學樣，笑爆隔離！影到太陽就落山至移師去第二度再影，總括嚟講係超開心！睇吓啲相就知啦...

Shiny Day...BBQ Day

都有幾個月冇去PaPa度BBQ喇，今次又嚟搞住佢，又大擦一餐，食好嘢囉...
今日風和日麗，其實最好就係去影相，所以响BBQ之前約咗Ronald去大埔食嘢，再去影吓相，個白痴話要個個禮拜都要換profile相~自己去影即影即有證件相咪得囉....哈哈！講吓笑啫...
食完碗美味嘅冬蔭功湯底嘅豬頸肉湯檬，就行咗過去鐵路博物館，個傻佬話未去過喎，就帶佢去見識吓咁啦！今日個太陽就係不得了，簡直係想溶咗我，所以影咗一陣就走啦，其實係Alfree嚟車埋我哋去Papa度。今次Alfree仲帶埋B仔嚟添，B仔第一次去咁遠咋，仲暈車浪嘔添！
同過往一樣，Papa都準備咗最好嘅BBQ食物同埋生蠔俾我哋食，不過最唔同嘅就係啲爛賭鬼掛住賭錢，我哋三個就係咁燒，係咁食，我唸我都有食咗十五隻以上生蠔，冇辦法啦，開咗唔食咩？！班賭徒玩玩吓話去打波，Papa又飲咗酒，所以由我呢個雪藏牌有驚無險咁揸出去...好多謝佢哋唔怕死咁坐我車，哈哈！
影相、BBQ、打波......盡慶的一天！

婚宴

她，見証新舊交提...
她，永遠像擁有著權力...
她，是身高最高的一個...
她，擁有著驕人的身材...
她，確是冰雪聰明...
她，以往常給我機會...
她，教識我許多、許多...
她，使我領悟到什麼叫〝防人之心不可無〞... ...
多得她，去使我懂得怎樣找尋自己逃離魔掌的路。
雖然我不曾是你的寵愛，也不曾是你賞識的人，什至我清楚記得你曾說過~只有你才願意領導我...一切一切，不是想將你曾對我做過說過的也銘記於心，只是到了這一刻對你沒感覺的時候，要出席你的婚宴，好使我想起你的種種。最後也希望藉此祝福你~白頭到老。
~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*
今天晚上又是一個公司聚會，最開心只是能見到一位經常在FB chatroom跟我說話的小妹妹Michelle見面，飲宴前也準備了一些Gift Gate的小禮物給她作見面禮，她的碓是漂亮的可人兒；她媽說她很愛看我的相簿，在網上看見我興奮無比...有趣有趣！