開餐

之前都講過最鐘意整嘢食返公司一齊食，平時夜晚至多都係得四個人嘅晚餐，今晚多咗一倍人~八個一齊食，哈哈好開心。點解又會咁多人呢？咁就係因為有幾個同事要趕住出更廢枕忘餐，好彩佢哋遇著我哋食屋企飯，又咁啱今晚有五餸一湯，不過白飯冇得任裝。自從响24位搬返過嚟30位，office變得熱鬧，除咗多咗我哋之外，又多咗個美女廚房，仲多咗好多家庭温暖添！見到佢哋咁開心，自己都好滿足，辛苦啲搬的餸返嚟都係值得嘅。我最怕我身邊嘅人肚餓，所以係人都知我有好多嘢食，肚餓嘅時候就會想起我，幾好！

搞搞震

聽日阿嫂舊曆生日，爸媽一早就準備好叫阿嫂返嚟屋企食飯慶祝吓！可惜阿哥依家响波蘿的海嗰頭，要下個月頭至返，阿哥响度阿嫂會更加開心。食飽飯無聊之際，大家一齊嚟研究我新買嘅高清手指，由於要駁天線，响房接收唔到，個電視天線個插頭又唔啱，所以我哋搬部notebook出廳試，又唔得，走入媽咪房又係唔到，最後都係用咗媽咪房插電視條天線，先至成功，仲收到成十三個台添！不過俾爸爸話我哋搞搞震呢！

今期狂熱

講到今期狂熱，非佢莫屬也，何方妖怪？3G iPhone也！當大家都响度談論呢部神一般嘅電話時，我真係一啲興趣都冇，可能自己唔係玩高科技嘅人，亦都唔係進住潮流換電話嘅人。點解又會講佢？咪就係我個師傅兼時髦師奶~Margaret出咗呢部電話囉！對於我嚟講，只有MP3同影相嘅功能最啱我用，其他就... ...哈哈...都算係一部潮人想擁有嘅dream phone啩！

送你

反常

呢幾日天氣反覆無常，就連我打波嘅成績都跟住啲天氣，一反常態！今日收早百無了賴，約咗師傅同Esther返沙田食完嘢就出去打波。本來唸住自己練習吓先，點知响球塲見到兩個Uncle，問我幾時同佢打返塲？擇日不如撞日，拿拿林去攞波出嚟打啦！呢兩個Uncle係我响保齡球塲第一個識嘅波友，佢哋平時一行三人，晏晝就嚟狂打幾個鐘，三個都係老闆唔駛做，好似打波就係返工咁，每人閒閒哋打成十幾局，今次唔例外，同佢哋打咗成七、八局，幾乎手都斷！不過今日打得非常反常，得心應手之餘仲超高分。點知到夜晚打比賽時，剷走咗虎口位嘅厚皮不突止仲扭親隻手腕，冇得繼續打真慘... ...

淚、笑

好耐冇試過睇電視劇睇到喊，冇唸過呢套台劇會咁感動人，我哋兩個睇到流晒眼淚，女人的確係水造... ...返屋企仲要睇返之前未睇嗰幾集呢！真係好好睇！感動得嚟又有得笑，今期推介~命中注定我愛你！

寫意+滿足

今日收早，一早就約咗Elaine去大浪灣曬太陽，基本上我唔會响沙灘游水，都因為係童年陰影所致。何解呢？因為好怕响水度踩到啲不明物體又或者啲海洋生物，事關細細個嗰陣，爸爸成日帶我同阿哥去石澳游水，有一次响水度踩到隻蟹仔，仲俾佢咬住我隻腳指，fing都fing唔走，喊到我死，自此之後都甚少响沙灘游水，除非係水清見底啦！如果唔係~咪搞我。瞓响沙灘望住個天你會有乜感覺？我最想係可以伸手摸吓舊雪，睇吓會唔會係軟綿綿~哈哈。同Elaine瞓响沙灘傾計真係好舒服好寫意，有時間會再去呢！

曬完太陽我哋决定揸車入元朗食嘢，事關車主唔識路，所以呢程超長途車由我呢個女車手嚟主控，45分鐘到達目的地，超勁乎？响元朗行咗一陣唸住食吓街邊嘢至去食金田，唸唸吓都係食咗串串燒沙嗲牛肉就拿拿林去食，因為再掃街的話，都唔會食得落壽司魚生！事實證明，我哋嘅決定真係明智，食飽飽仲唔執輸去食埋個甜品添，滿足晒！

傷痕

一首好舊的歌，又或者你從未聽過。傷痕~每個人都會有，是深是淺也會有痕跡；你會努力忘記傷磨滅痕跡嗎？一切也處於負面的時候，也會將本身的愛也淹沒嗎？

是一首傷感嘅歌，還是一首令你振作的歌？那就看你怎樣選了！

練習、練習

又到咗逢星期一嘅活動~打保齡，平時放工就會即刻出去練習練習，但係今日有啲例外，我選擇咗經東涌再落球塲。點解呢？咪就係因為個人太無聊，同埋最主要嘅原因係想試吓部相機，基本上我仲未得閒去閱讀吓本Menu，所以都係用P mode嚟玩住先；影咗幾張相，發覺啲顏色真係好分明，好機好機，再深入啲睇怕我要熟讀咗至搞得掂！

影咗一陣發覺時間又差不多，係時候要去攞Lane，呢啲嘢通常都係我做，除非我唔係收早啦！雖然我係隊中唯一一個女將，但係唔代表我受到寵愛，買嘢食買啤酒計分啦啦隊觀眾甚至洗抹波布~都係我，慘乎？！不過玩得開心已值回票價了！而今日我自己練習咗四局，就角色轉移做咗記分員兼啦啦隊。唔駛出賽都好，冇咁大壓力吖嘛！

中毒乎？！

今日返工大吉大利，一切都掌握手中，即係順風順水之餘，仲發掘咗個大家都可以一齊分享嘅節目~睇電視。查實我office入面係冇電視機嘅，曾幾何時我老闆話買咗部32'LCD電視俾我哋，仲帶我哋去睇吓個盒，伸手一摸的確係有部電視，不過又點會係買俾我哋睇呢？
言歸正傳，今日嘅開心大發現就係~~~台劇"命中註定-我愛你"
用乜嚟睇？史上最大發明~You tube！聽落個劇名有啲老套，幾個同事都話好睇，我同豬豬都唔執輸，拿拿林開嚟睇；開頭都有啲悶，基本上有啲無聊同搞笑，唔知點解又可以令我睇到唔願走！？唔通中咗毒？***我唸應該係中了台劇毒。。。

天倫之樂~茶敍編

數數手指，都唔知有幾耐冇一家人飲茶，基本上我個人都幾鐘意飲茶，不過最憎就係等位，老實講如果要我等，我情願唔食... ... 哈哈！係咪好衰呢？現今世代，仲要等叫no.？No way!訂枱飲茶最實際過啦！回顧小時候，阿嫲最鐘意帶我同阿哥去飲茶，用乜嘢餵飽我？干蒸燒賣也。阿嫲話次次去飲茶問我要食乜，我都話燒賣... ... 哈，燒賣的確陪住我成長~至少我依家都未厭先吖！相信下一次一家人嘅茶敍，都應該會係一個月後，皆因阿哥今晚要向世界出發~出走Russia，仲話會去波羅的海~即係羅威下面呀！

阿哥~祝你順風順水，快啲返嚟陪吓阿嫂啦！

我的新玩具

唔記得幾時開始鐘意Snap Shot，應該係大概三年前呱...嗰陣時鐘意用電話snap，不過永遠都唔會save入電腦留底，又自從買咗部Panasonic FX50嘅DC後，出街唔少得有佢，正所謂留住美好一刻嘛！在我而言任何時刻都不容錯過，係咪？

正所謂工欲善其事，必先利其器，經過兩次傻瓜攝影學會嘅活動，都係時候裝備吓自己；有見及此，當然唸唸買乜機好啦，本來都有唸過買部DSLR玩吓，手感好啲又可以影到景深，唸起都開心。不過...經過深思熟慮加埋朋友嘅專業意見，我都係揀咗佢~ Ricoh GX200~非一般嘅傻瓜機。

現階段要熟讀本menu，不過仲未有時間搞佢住，因為仲有件新玩具玩緊，仲搞到我頭都大埋！

主題曲

當你聽到一首曾幾何時經常聽嘅歌時，你會想著什麽？會否記起當時的人物、事物與背景嗎？我會！我經常都會。這會時那一刻的主題曲吧！所以每個人的生命裡都會有許多許多的主題曲。這也是我其中的一首.....

盼望的緣份

A very sad song...

生日快樂

一直到好想睇嘅一齣戲，始終到依家連DVD都冇睇過；又一直都唔想瞭解內容，因為怕知道咗內容日後再睇會失真。唔知道幾時有機會睇，若有一個深愛自己嘅人陪我睇，我唸一定好浪漫... ..可惜未有我份... ...

祝你生日快樂！祝生日的人，相識的不相識的，也快樂！願世上每個人都平安、快樂。

歡聚、歡送

今晚有幸能夠出席Tony響尖東東海搞嘅歡送晚宴，事關我七點至響公司走，去到半路我老頂竟然打俾我問我到未？！仲話食緊美點雙輝添！唔係掛，等我去食橙！？去到班爛賭鬼仲攻打緊四方城，仲好話我遲...

由於豬豬識得個主廚，所以響招呼同菜式方面都令我哋極滿意，簡直非一般款待。(我兩個星期前幫個朋友訂咗一圍，食完都叫好，有口碑呢！)打從第一味嘅蟹粉小龍包同頭盤嘅八小碟，都已經有八成飽嘅感覺，值得一提嘅係個忌廉汁烏冬扇貝，好鮮味~係啲烏冬呀；仲有個鵝乾脆皮鷄，鷄肉起骨加埋一塊好似銀絲卷嘅包上夾往塊鵝干醬... ... 話飽都要食返件！最後當然唔少得嘅係甜品啦...有西瓜凍糕、奶皇馬拉糕同最出名嘅原隻蛋旦蓮蓉/麻蓉巨型大壽包。










食飽最好就係乜?賭也！小女子不暗賭術，只作旁觀，見到佢哋玩得依嘩鬼叫，好搞笑。 我哋仲話下次有乜喜慶活動，首選呢度！ 超正!

是怎麽樣的音樂，可以讓一個人聽得這樣感動

一直都覺得台灣製作的MTV很出色，拍得很細緻也很令人動容。很愛很愛這首歌，也很愛這MTV。

習慣

人習慣咗俾人服待會變得懶惰嗎？平時返工如果我有帶嘢食返去,到食飯嘅時候,總係我去叮熱啲飯餸、鋪好枱準備碗筷,到食飽嘅時候,佢哋拍拍蘿柚就返埋位做嘢,我自不然就會去收拾殘局.

今日局勢扭轉,波波張帶飯餸,猜包剪揼輸咗去叮嘢食,猜包剪揼輸咗要洗碗！上天對我真好,猜贏晒乜都唔駛做,坐响度食就得,真爽！

食飽飽就上歡樂網吧...即係上網呀!...此時有人問我做乜坐响度唔做嘢??!!嘩,話晒我都猜贏咗吖!...某人話唔習慣我坐响度,我應該去服待佢哋至啱!!

習慣俾我服待喎...So funny....

共勉之

我響新加坡嘅表妹小安尼，今年大學畢業了。爸爸話要send個e-mail俾佢恭喜佢同勉勵一嚇，仲起埋個稿俾我...睇落有啲老套，其實又幾有意思...

振作那有閒時，
少時壯時老年時，
時時須努力；
成名原非易事，
家事國事天下事，
事事關心。

大開眼界

平時都覺得自己係大腳板，好難至買到鞋。有冇唸過NBA嘅球員要著幾號鞋呢？我從來都冇唸過，但係今日響好偶然嘅機會下，可以親手摸到奧尼爾著過嘅58號籃球鞋，大到不能想像...

苦行、樂事

細個時乜都鐘意玩，不過玩親都跟阿哥去玩，而從遊戲中學習嘅都冇乜邊幾樣，過往最大嘅經歷，都應該係做童軍。係咪有啲意想不到呢？

想當年跟阿哥去做童軍，不過唔係戴西瓜帽嗰種小童軍，而係深資海童軍。話明係海童軍就梗係主攻水上活動，當然陸上嘅遠足露營、野外定向等等，都唔少得。
講起行山，簡直係攞命，至少都行三日兩夜不突止，仲要揹住十幾廿kg裝備去行，好彩年青力壯，唔係都幾難搞。

其實今次係想講嚇〝乘風航〞~歡號，點解會講佢呢？事源上次去蒲苔島之際，響香港仔避風塘附近再度跟佢遇上，亦勾起我絲絲記憶。想當年我嗰區搞咗個兩日一夜嘅澳門交流團，唔係坐噴射船而係坐帆船去澳門，基本上能夠用咁嘅途徑去澳門，的確係好難得，有機會乘這帆船到澳門與當地童軍交流，亦都好難得。但最令我記憶猶新嘅就係響回程時遇上七級大浪,船艙入水桅桿也吹斷,感覺係船也快翻沉，有如鐵達尼號.....我啲黃膽水嘔到冇得嘔!好辛苦好恐怖，就好似响生死邊緣，亦是難得的一次海上歷險記!

過往在童軍生活所經歷過的當中，嘗過苦的滋味，也是一個快樂嘅回憶。

笑看風雲變

出門口，藍天白雲；在途中，烏雲蓋頂；工作中，狂風雷暴；再工作中，雨停下來；繼續苦幹，狂風雷暴；回家中，傾盆大雨；結果... ... 全身盡濕... ... 皆因沒帶兩傘... ...淋病乎！？

行程 : 沙田 →機場 來回 約76公里

是蠢?還是笨?

蠢和笨的解釋會是一樣嗎？
我發覺自己堪於蠢和笨裡頭，什麽也看不清，也不願再面對自己...
怎麽了？！

睛天

過去的一個月，雨下不停，鮮有陽光。今天休息了差不多一個月的太陽伯伯，終於強勢出擊！...飛機也要戴上用白雲做的帽來擋太陽呢！