時、時

會相信生命是脆弱的嗎？彷彿每個人每件事都有他/它的時限，人會漸老，事物會變舊，一切也在停在變。中學時讀過聖經，裡面提過~
"凡事都有定期、天下萬務都有定時．
生有時、死有時．栽種有時、拔出所栽種的、也有時．
殺戮有時、醫治有時．拆毀有時、建造有時．
哭有時、笑有時．哀慟有時、跳舞有時．
拋擲石頭有時、堆聚石頭有時．懷抱有時、不懷抱有時．
尋找有時、失落有時．保守有時、捨棄有時．
撕裂有時、縫補有時．靜默有時、言語有時．
喜愛有時、恨惡有時．爭戰有時、和好有時。
這樣看來、作事的人在他的勞碌上有甚麼益處呢。 " 傳道書3:1-9

要在意別人珍惜自己與否，重要的是你是否首先去珍惜身邊每個人每件事。萬物有定時，一切交給天意安排。


浮夢世界　如霧世態
愈看得真　感想愈怪
若要假嗎　天真的我
不會粉飾天賜的情懷

寧願告退　難像你醉
未慣一生　不分就裡
讓我此生　交給天意安排
不想講也不必猜

平常的心　　從沒顛簸陌巷
無須高低起跌升降
每項平常事　　平凡又如何
結果亦是得一個
只不過是感覺

偶爾天邊太陽雨
雨線飄飄化成詩
每闕新詩　　散落我心深處
停留住是情意

獨行

朋友同事們都好驚奇，點解我可以一個人踩單車由沙田踩去大埔三門仔？佢哋話好慘啫，冇人陪冇人同你講嘢，會悶到爆！對我嚟講又Why not?無疑一個女仔踩去咁遠，有乜事起上嚟都幾危險，過日光日白唔怕得咁多。琴日收早，我竟然响33度高温踩出我第一步，出發前的確有啲猶猭，因為我的確驚中暑，半路頂唔順暈低call白車好瘀皮家嘛？當然我最後都排除萬難，輕輕鬆鬆嘅踩到去三門仔，到了一家小店食咗碗淨水餃雲吞，其實嗰度啲牛腩同五香鳳爪好好食，亦好有衝動想買外賣返屋企俾媽咪試吓仲想買啲返公司俾班為食貓試吓，過由於我技術有限，驚顧到盒牛腩鳳爪顧唔到自己，所以決定放棄。以往都嚟呢間小店都係同我嘅前度一齊踩單車入嚟，當然都係佢帶我嚟我至識路啦！如今自己單拖去到，感覺可一樣了。唔知點解响嗰度睇個太陽特別靚，有山有水有天有地，有詩意！回程途中，响某處影咗張相後，驚見有位我稱之為細路嘅十六七八歲嘅青年人，坐咗响路中心，狀甚痛苦。我當然有落車睇下佢係咪炒車，點知原來佢係條大腿抽筋，而佢竟然叫佢啲朋友繼續踩，佢啲朋友真係好好，真係繼續踩，一個都冇回頭睇吓佢！我冇嘢可以做到，只係扶佢坐埋一面，叫佢抖吓，我驚佢又抽筋炒車所以陪佢踩返沙田，佢同我講咗十個唔該。响護航途中，終於追得返佢啲朋友仔，我亦功成身退。我又响度唸如果我好似佢咁，會唔會有一個好似我咁嘅人出現呢？Hope so...
P.S. 琴日踩咗三個鐘，返到屋企有啲虛脫嘅感覺，繼而手脚冰冷忽冷忽熱全身乏力，精神、體力都透支了！

說愛

愛 是 恆 久 忍 耐 、 又 有 恩 慈 ． 愛 是 不 嫉 妒 ． 愛 是 不 自 誇 ． 不 張 狂 ．不 作 害 羞 的 事 ． 不 求 自 己 的 益 處 ． 不 輕 易 發 怒 ． 不 計 算 人 的 惡 ．不 喜 歡 不 義 ． 只 喜 歡 真 理 ． 凡 事 包 容 ． 凡 事 相 信 ． 凡 事 盼 望 ． 凡 事 忍 耐 。愛 是 永 不 止 息 ． 先 知 講 道 之 能 、 終 必 歸 於 無 有 ． 說 方 言 之 能 、 終 必 停 止 、 知 識 也 終 必 歸 於 無 有 。(哥 林 多 前 書13:4-8)

蝸牛

有意思的詞，送給自己的歌

輕波作浪

作為一個處於夾心人部門嘅我，以為每日辭勞苦咁為各先生小姐們安排作息時間，盡量俾到佢哋最均衡嘅工作，盡量唔好令到佢哋辛苦同難受，盡量迎合佢哋嘅需要，以為就是功德圓滿。可惜的事一個颶風打過嚟，乜都打沉晒！雖然都已經剎有介事咁準備人手編配，我哋成Team人眠休的，根據老闆嘅指示作出準備，最終得到嘅係千夫所指，响公司做咗咁耐嘅妳妳妳s，唔係未試過打風返工啫！我哋Team都係幫公司做嘢，駛唔駛恐嚇我啲同事呀？乜嘢錄埋音去勞工處告公司？？？真係冇得頂，最怕妳得個講字，最好拿拿林去實行！我哋做得唔妥善嘅話，令妳妳妳s難堪的話，我哋會認錯同埋下一次我哋會做好啲。但對於一些幼稚無聊嘅行為，請妳妳妳s檢討一吓，正所為上樑正下樑歪，作為高級職員的妳妳妳s，係咪應該做一個榜樣，為當時嘅情況去安撫妳們之下低級少少嘅職員呢？我哋得兩對手兩把口兩部電腦兩部電話，要處理百幾二百個同事，千幾二千個tasks，又會體會我哋嘅苦嗎？我哋唔介意俾妳妳妳s責怪這樣那樣，因為妳妳妳的反應，正正反映出妳妳妳s的修養。自問讀得書少嘅我，都知道乜嘢叫做體諒同包容。妳妳妳s對我哋嘅態度，絕對唔會影響我哋嘅心情，最難過嘅塲面我哋都捱得過，妳妳妳s又算得係咩呢？妳哋繼續輕波作浪啦，學我partner話齋~睇吓邊個長命囉！反正做得幾好唔會有人讚，有一件事做得唔好就會將以前所做得好嘅一一推翻，唔好誤會我需要讚美的話，唔好煩我就已經好多謝，哈哈！仲有好想多謝部份懂得體諒包容嘅同事，正正表現~人間有愛，也懂得愛。

P.S. 妳妳妳後面嘅s，代表眾數，稍為有讀過書嘅都應該識掛！？

十字架

很久的當年 媽媽天天囑告 好心交給人
總可得到好報 過去按這教導埋頭做
可惜隨年長一步 傷口隨年多一道

伸出手攙扶 遭鬆開手警告
交出心戀愛 反得傷心的控訴
嫌棄我過份熱情流露 或是仁慈得恐怖 燙手愛意怕碰到
彷彿背上十字架捨我救贖未算好 越奉獻得到結局越殘酷
教我為免傷勢再會變更糟 圍牆變更高
圍住了自己的去路 防護罩終變成墳墓
將根本的我葬下去獨自老

伸出手攙扶 遭鬆開手警告
交出心戀愛 反得傷心的控訴
嫌棄我過份熱情流露 或是仁慈得恐怖 燙手愛意怕碰到
彷彿背上十字架捨我救贖未算好 越奉獻得到結局越殘酷
教我為免傷勢再會變更糟 圍牆變更高
圍住了自己的去路 防護罩終變成墳墓
將真的我埋藏下去 哀悼裡獨個漸漸老

多想光陰退後到舊時 童年重渡 多斬釘截鐵共處態度
我對你好所以你會對我好 心裡沒旁騖
無奈這幸福的國度 已飽經災劫無寸草
今天只得我野地裡在獨舞

要怎麼的上路 期望一天我能知道

謝安琪的十字架，裡面提到〝好心交給人，總可得到好報〞，你會同意嗎？我總是覺得〝施恩莫望報〞，才是最好的囑告；〝我對你好所以你會對我好 〞，這應該會是必然的事吧！但至少你沒有對人作破壞的事，那便會心安理得了。〝伸出手攙扶 遭鬆開手警告〞，善意的付出，遭無情的拒絕做成了傷害，會叫做自討苦吃嗎？曾經覺得是，但想深一層做的是壞事，也只是別人懂珍惜懂得欣賞吧！
我沒有宗教信仰，但頸上也掛了一個十字架，曾經小心的失去了，心裡是味兒，好想再擁有，跑到店子裡看，卻再也找到，店員說缺貨了。在某年生日，好朋友送了一個一模樣的十字架頸鏈給我，也就是現在我所戴上的，是巧合也是緣份，謝謝天。

鍾愛

很愛他的歌，也很愛他的自彈自唱，是一個很有才華的人。這也是一首我喜歡的歌...
Kiss Goodbye

向風暴出發之苦戰廿二小時

前日九號風球嗰一刻，你身在何方呢？原本我要返點半，點知我老闆打俾我叫我返四點半，到兩點半時又叫我返夜晚九點；心唸我老闆真好，當我係Rescue Team，随傳隨到；當然我冇聽佢支笛啦，我唔會等十號風球乜車都冇得搭嘅時侯至返去囉，所以我响啱啱掛No.9時，冒住俾樹枝插死、俾強風吹走嘅危險，走出我向暴風出發嘅第一步。
落到街我真係好驚，因為大風到你唔敢相信，成條街得我一個行，仲要啲樹葉同吹斷咗嘅樹枝打橫飛過嚟，行行吓又驚上面會吹爛玻璃跌落嚟插死我，你話驚唔驚？！
用咗個半鐘安全返到機塲，竟然真係冇乜人，啲市民今次真聽話，冇嚟機塲白等，因為一隻機都冇嚟過亦冇飛過，恐怖嗎？
唔好以為冇機升降，我就無嘢做，啲高層落聖旨，所有人要返歸，未返工嘅繼續留响屋企，當係放假，返到公司嘅同返緊公司嘅都回歸温暖的家，全部第二日放假嘅都要返工，返夜嘅要返早啲即係返全日。呢個决定真係玩死我哋，俾人鬧到飛起，我完全明白你哋嘅感受，但係希望你哋知道係你哋個大老闆吩咐我哋咁做，我唔明點解佢唔行過去同班大帝講，真係揾著我哋嚟搞，吃力不討好嘅就叫我哋做，真命苦。
通頂嘅時間特別過得慢，我做啲乜？咪打機囉，唔係games呀，係執duties呀。基本上我採取放棄態度，因為我知道執好都會亂晒龍，又何況根本唔會執完。事實上啲機真係痴晒線，話十點到嘅十二點都未見影，啲機要真係touch down咗至知泊乜嘢位，超爆笑。呢度要人嗰度又要人，生仔都要懷胎十月啦。十個煲得三個蓋係咁喇。
多得鸚鵡~我第一次响九號風球行出街。
多得鸚鵡~我第一次一次過坐晒馬鐵、火車、地鐵同機塲快線。
多得鸚鵡~我返咗晚通宵。
多得鸚鵡~我連續做咗廿二個鐘。
多得鸚鵡~令我更掛住我屋企張床。
多得鸚鵡~我哋部門又再一次被咀咒。
多得鸚鵡~我終於可以連續瞓十三個鐘。
多謝鸚鵡...

孩子

今日放工約埋幾個同學一齊去睇BB，不嬲都鐘意BB嘅我等咗呢日去睇小王子等咗好耐喇。BB好多頭髮，眼晴大大，仲好識氹人開心添。其實佢只得一個月，但係好似識聽人講嘢咁，叫佢舉手真係舉手，真鬼馬。現今出世嘅小朋友真係幸福到得了，一出世就被視為家中之寶，享受住無憂無慮嘅生活。每次知道身邊嘅同事認識嘅朋友有咗BB，自己都會好興奮，因為我覺得懷孕係最幸福也是最奇妙不過的事。養育孩子，係父母嘅責任，有時响街度見到啲小朋友自己通街走，冇人理，我覺得佢哋好可憐，父母忙於工作，冇時間去照顧，又為何要生孩子呢？所以我好多謝我爸爸媽咪嘅嚴厲管教，致我流連街頭。也多謝他們給我無施的愛，到依家都仲當我係細路咁照顧得無微不至。要記住孩子需要愛，悉心盡培育。將來若我有了自己的孩子，我一定會俾最好嘅佢，用最多嘅時間陪佢一齊成長，我唸一般父母都會好似我咁唸掛？唸吓以往我哋同學嘅聚會，成班柴娃娃鬼殺咁嘈；如今將會變成一個小朋友嘅聚會了，個個都一家幾口，亦樂乎。在此希望小王子健康、快樂地成長！

感謝

雖然八號風球都要返工，但收到朋友同事嘅電話同sms叫我出門口要小心啲，即刻心都甜埋。要相信人間有愛呢！今日要向暴風出發，有著你有著妳，幾難過都會捱得過。要返工嘅妳，都要小心呀！在此感謝你們嘅關心呢！

多得他

失驚無神嚟咗隻鸚鵡，搞到我哋頭都大埋。呢個颱風似乎來勢凶凶，我公司各大部門嘅經理開完個緊急會議之後，我老闆又同我哋開會，話CEO要將返朝早九點打後嘅更全部改返下午六點後，仲要九點後每個時段唔可以多過三十個同事响度，個個聽完得一個反應，就係〝吓〞！大家都覺得呢個決定好勇敢，事關各歐洲、亞洲嘅航班全部都避咗個風，會响下午六點後至唸吓嚟唔嚟，好幾隻歐洲機零晨三點後至到，各前往中國內地有七成航班取消，即係話返早都唔會有機做，淨係有十幾班機未話取消，經驗話俾我哋知，到時都會取消。最大件事莫過於要將百幾個更改時間返夜啲，最慘仲要通知埋啲同事個新嘅返工時間，個個知道要由返朝早九點十點，改到返下午四五六點，原本返三四點嘅，梗係要返七八九點，佢哋嘅反應係呆咗！我見到啲flight tasks就想嘔，我同另外一位同事夾手夾腳狂改，改晒啲返工時間都已經點幾，仲要未assign啲duty去條shift度，最後我哋唔鬼理咁多全部unassign，反正都唔知飛唔飛！我哋都知道啲同事一定响心裡面咀咒我哋MP，希望你哋知道我哋都係受命於全公司最大嗰個，亦都希望你哋知道我哋一啲都唔好受，俾著係我都會唔開心，一切都係多得他帶挈，我都係啱啱至返到屋企，真係多得他！

我的座駕

我的座駕係一部價值百幾萬嘅車，幾乎日日管接管送載我返工放工，正是佢~巴士。
敢講一句~我同呢條巴士線一起成長，也一起經歷風雨，因為一有呢條線我就開始搭佢返工放工，巴士司機嘅面孔早已熟識，咁多年都冇乜點換過司機，所以同大部份嘅司機都會打招呼。曾經試過我未行到個站，駕巴士响我面前飄過，心唸都係搭唔到，事關我仲有成50米至到站，點知駕車停咗响站等埋我，其實都試過好幾次喇，所以覺得自己好幸運。又試過一次放工入馬鞍山阿哥屋企食飯，咁梗係唔會响屋企個站落車，亦冇人鐘要落車，點知個司機停咗响個站度，以為我瞓過龍唔識落車等我落，哈！真細心！有時候返早，明明有人响前面排隊，駕車都會停响我面前；司機知道樓上冇位，會靜靜雞叫我快啲响樓下揾位坐，叫我唔好上樓上。今晚收工仲搞笑，司機哥哥問我係咪好眼瞓，淨間到站嗌Mic叫我起身，真細心！唔知點解唔駛返工時見到呢駕巴士，會好開心，有一次同媽咪响屋企附近見到佢，我指住大叫〝我駕車呀！〞媽咪話我痴咗，仲問我駛唔駛去搭喎？！搞笑咩？！名乎其實的日久生情呢！謹在此多謝各司機叔叔哥哥這樣照顧我，每日接載我安全抵步平安回家！

超藍

好耐冇見過一片超藍嘅天空，萬里無雲，最好就係瞓响沙灘享受陽光，可惜要返工呢！

一聽鐘情

最近愛上呢首日文歌:青山黛瑪唱嘅〝留在我身邊〞，覺得旋律好正，不過呢首係SoulJa Rap歌個版本！實在太正...有埋中文字幕，都仲可以知佢唱乜！

擁抱夏日

一連兩日收早，都去咗Alvin屋企樓下個會所泳池游水，簡直係炎炎夏日最佳嘅消暑方法，亦都係減肥嘅一種良方。佢個會所有兩個泳池，兩個泳池都有佢嘅特色，一個細啲，好似金魚缸咁人哋會睇到池中活動，一個大啲似返個泳池。簡單啲嚟講我鐘意後者，曬太陽都曬得應啲，所以依家有健康啲嘅膚色。趁住仲有咁好嘅陽光，要keep住繼續游呢!

愉快的晚餐

今晚約咗兩位老朋友食飯，去咗尖沙咀食放題，基本上食物其次，聚舊為首。雖然大家唔係成日見，但係都唔會因而變得陌生。識咗十幾年，時間的確改變了許多事和人，慶幸我哋嘅友情都一樣冇變過，反而變得更交心；以往冇提過嘅事，今晚盡情哋講過痛快。老朋友你要好好保重身體呀，知道你身邊的人會擔心嗎？期待下一次的再聚... ...

亦樂乎！

收到誠意的邀請，今晚去到Miu個舅父屋企BBQ，事源有三位屋企人生日、七位親戚响丹麥返嚟香港渡假，加埋起上嚟亦即係十全十美的約會！？
見到Miu一家人，有莫名其妙嘅親切，初初見面已經對我好似自己屋企人咁，仲記得第一次見舅父時，佢已經話要介紹佢個大仔我識，仲攞晒啲相我睇，次次去BBQ都話要介紹我識，好搞笑。到上次BBQ時，大表哥响外國返咗嚟，大家認識咗亦故之然都知發生乜嘢事，亦即係得啖笑。今晚見到阿婆，佢第一句問我做乜咁耐唔嚟，最搞笑嘅係問佢個大孫仔有冇打電話俾我？！我話梗係冇啦，我哋一人養咗一隻白鴿玩飛鴿傳書，阿婆淨係响度笑，其實我都唔知佢知唔知我係講笑，話晒佢都成八十幾九十歲。舅父仲搞笑，話大仔娶唔到我，叫細仔娶我做二奶，唔係咁苦命掛~要做阿二，講笑啫。。。
阿姨同佢一對混血兒仔女拖男帶女响丹麥返嚟，三個小朋友好得意，兩個仔仔通屋跑，囡囡好乖坐响度畫公仔，佢哋只係識講丹麥話，所以有啲雞同鴨講。佢哋一家人好大家簇，如果齊人一定熱鬧到得了，亦俾我感受到佢哋一家嘅温暖。
之所以話有朋自遠方來，不亦樂乎！真係冇講錯。多謝你們的邀請呢！

無證居民

今晚返到屋企發現一件好重要嘅事...就係唔見咗個牛牛銀包!!!!!
錢事少，唔見咗身份證、回鄉咭同車牌事大！都唔知係今日黑吖、琴日黑吖、抑或前日黑。唔好問我點解會咁，我真係唔知，知道就唔會唔見...救命呀...張回鄉咭未用過就...嗚呼哀哉!!

最新直擊報導 on 14AUG08...失而復得的感覺太美妙了！
我揾返晒喇！... ...近排好似食錯咗條魚叫做失魂魚~~真弊！

重温

是感動的一刻，孩子的可愛笑臉，為世界增添快樂與温暖... ...

重遇~緣份的延續

最近同返一個識咗十幾年嘅朋友响MSN度傾計，咁多年以嚟只係响朋友口中得知佢嘅消息，知道佢一切安好，都冇唸過會再度重遇。這次重遇，真係要多謝Facebook，佢真係幫我揾返好多朋友。對上一次見面响朋友屋企食飯，所以冇乜機會可以詳談。還記得當年一齊出去玩嘅畫面，也是無憂無累的時代，好開心。在這十幾年當中，大家都經歷過唔同嘅事，像在地球走了百多回，終於再遇。同佢傾計的確好舒服，所以乜都可以講，因為我覺得佢係最忠實的聆聽者。她已為人妻，有著快樂甜蜜的生活，也是我最欣慰的。大家說過，要珍惜的謹是友情，而是身邊的所有也要珍惜。所以~在你們身邊記住有一個我，別忘了我~緣份天注定... ...

點唱

發現她,感謝你...
送你~衝動

英勇、英雄

今日新聞除咗講奧運中國又摘金之外，响小小嘅香港再發生一次大火，响熱鬧嘅彌敦道上，再一次塞滿救火車。新聞話五級火警發生响太子嘅一楝大厦，心入面即係唸起我個陳年深交，當然馬上打俾佢睇吓佢有冇事，點知冇接電話，唯有SMS佢，打返俾我知道唔係佢住嗰度，冇事都安樂啲。最不幸嘅就係有兩個消防員响拯救被困者時旬職，我唸我心裡會比一般普通人感受得多，因為消防呢兩個字陪住我長大，皆因我老豆係消防員，甚至我表姐夫，我好幾個同學都係消防員。記得當年嘉利大厦五級大火，公司Staff Party完咗返屋企睇新聞至知咁大單嘢，我望住爸爸，心唸好彩爸爸休息响屋企，如果唔係我都唔知點算。一直以來都覺得最英勇嘅就係消防員，救火救人拯救生命，使命係幾咁偉大。記得細個嗰陣爸爸會偶爾講吓救火嘅實况，以前到外地見到消防車、消防局都會影低返嚟俾爸爸睇，呢個算係對消防嘅一個情意結嗎？無論如何，死者已矣，感謝你們的無私，也感謝你們的英勇，謝謝你們，我心中的英雄。

再送你

愛的人 沒有一生一世嗎 大概不需要害怕
有感情 就會一生一世嗎 又再惋惜有用嗎

One World One Dream

今日2008年8月8日係中國人嘅盛事，亦係全世界嘅焦點。四年一次嘅奧運，今屆响我祖國北京舉行，身為中國人嘅我，唔多唔少都有啲興奮，奏起國歌時，仲有啲淚水標出嚟嘅感覺添。而且奧運馬術比賽响我對面河舉行，應該係我呢生人以最短嘅距離去接觸奧運。睇完個Opening，感覺好壯觀好澎湃，張藝謀果真係超級大導演，亦是中國人嘅驕傲，我老豆好醒，錄咗隻高清DVD，冇睇過嘅你，我好樂意燒隻過你欣賞。
在同一個世界裡，會有同一個夢想嗎？同一個夢想又會係乜？無論如何... ...中國，加油！在我身邊的人，加油！

自得其樂

話說本來約咗Elaine去深圳揼骨，等我有機會用吓我新換嘅回鄉咭，殊不知隻懶瞓豬唔知醒，唯有取消行程。唔知點解都幾想去行一轉，無奈我唔識路，自己一個去好似危險咗少少，唯有唸吓有乜好搞。其實最好就係買嘢返屋企整嘢食，上吓網搞吓呢樣搞吓嗰樣就最好，終於我整咗兩款沙律準備聽日攞返工食。









左面係吞拿魚薯仔洋葱沙律，材料除咗嗰三樣主菜之外，仲有粟米、德國煙火腿、cheddar cheese、磨菇，用嘅係BB蛋黄醬。
右面係蟹子蟹柳青瓜沙律，材枓同個名一樣，不過豬Ruby鐘意食菠籮同粟米，上次冇加呢兩樣佢响度瓜瓜叫，所以特登加咗俾佢。
整好後自己試吓味~超正，仲食到唔停得口添。基本上冇難度，切晒撈埋一碟就搞掂，係啲用料要上盛，至係最緊要！所以次次整嘢俾人食，見到佢哋食得滋味個樣，自己都好開心。我唔識煮餸，淨係識整沙律同埋芝士蛋糕，有機會要學整返幾味至得。

三個人的約會

今晚同Margaret、Esther去咗國泰城食Buffet，講就講咗好耐，今次終於就啱時間，齊齊食返餐。其實我對Buffet真係麻麻哋，事關我食少少就飽食唔得多，所以好少主動話要去食Buffet！間餐廳嘅環境一般，食物同價錢成正比，整體上我都好滿意。一向滴酒不沾嘅我，竟然同Margaret一人一杯紅酒，莫非~我變了??或者我應該改變一吓自己...

風、瘋!

一起身就即刻上網睇吓掛幾號風球，點知真係掛咗八號風球，真灰。好就好在仲有機塲巴士坐，上車時司機哥哥問我做乜仲要返工？！咪就係因為係二打六所以咪要返工囉！今日個更超長，都預咗唔駛收工。啲機都唔知飛晒去邊，有啲明明就到，飛飛吓又要轉飛其他地方，隻隻機都話TBN(To Be Notice)，咁點搞呢又？啲客又顛我啲同事又做到顛，我啲flight tasks成地都係，都已經見慣不怪。因為我嘅中旨係船到橋頭自然直，時間會帶走一切，包括嗰啲unassign嘅flight tasks，所以唔駛擔心。又有乜嘢大事未見過呢？打風黑雨幾惡劣幾唔夠人做嘢都經歷過，我哋呢個部門都算打不死！唔知又有冇人覺得我哋都好辛苦呢？同事們：要聽話呀！

一個人在途上

見到郁達夫呢個名字，唔知你會唸起啲乜嘢？中學嘅時候曾經讀過嘅一課文章叫"一個人在途上"，唔知你係咪我個年代，到依家都仲好記得呢篇文章，硬係覺得好有意思。話說回頭，你喜歡一個人在途上嗎？你又會有自己嘅一篇"一個人在途上嗎？今日我做咗呢篇文章嘅主角... ...

今日放工就返咗屋企，唸住出去踩單車，殊不知車頭個摺位鬆到lock唔實，根本冇可能踩到；所以我用咗最愚蠢嘅方法攞去整，就係推架車行過去火炭整，我老豆話我痴咗線，有的士唔搭熱辣辣揾自己笨，佢講完一大輪之後，我都好堅持行過去，我有的是時間嘛！

<-未整前
整好後->
個哥哥好好人，好快就幫我搞掂，仲話要有愛心至會整得好，so funny!唔該晒唔該，下次我架大蘋果有乜事，必定嚟揾你！




繼而我就開始我嘅旅程....沙田-大埔海濱公園-沙田

今日比起以往星期日租單車踩嘅人，比想像中少好多，至少唔駛再閃右避。自己一個踩吓停吓snap吓，都幾寫意，如果早啲出門口，我唸我會帶本書去科學園對出嘅海濱公園碼頭坐吓聽住歌嚟睇書再望吓海~一樂也！


返到屋企，成個人有啲虛脫，可能太耐冇踩過吧！

回憶、短聚

放工百無鳥賴返到沙田，行咗一陣書店，睇咗一陣免費書，本來想買本散文睇吓，唸唸吓都係唔買住，事關同事借嗰兩本都未睇完，又要玩電腦又要台劇又要玩相機仲想踩吓單車，睇多本書就真係唔駛瞓。

行過新城市廣塲個Snoopy Land，突然間唸起我好耐以前嗰隻會吱吱聲叫嘅Woodstock公仔。其實我好鐘意佢，唸起佢又回憶起嗰陣响台灣生活嘅日子。人老咗就會想從前吧... ...
今晚同Elaine食飯，去咗上次想去但係俾人包塲嘅餐廳，今次終可以入去試試 ~ Sky Platform 响沙田大會堂酒樓天台嘅一間意大利餐廳，坐落好舒服有啲泰國feel。食物方面尚算ok，應該係坐低飲杯嘢傾吓計嘅好地方，好過去Pub，誠意推介~~

Friendship

Dear Friends,

Its amazing when strangers become friends, but its sad when friends become strangers. I never want to lose you as a friend. I met you as a stranger. Now I have you as a friend. I hope we meet in our walk of life where friendship never ends.

I may not be the most important person in your life. I just hope that when you hear my name, hear my voice, you smile and say...that's my friend.

Love,
Wing

三分鐘

前兩日收到Raymond嘅電話，話今日會响上海經香港返台北，咁啱今日有返工，可以去見見面。對上一次見佢，應該係上十一月去台北玩，順道去探佢，咁怏又已經八個月，佢仍然係咁頻撲，坐飛機仲多過我坐地鐵。每次路經香港佢都會打俾我，每次都話想見吓我，唔經唔覺都識咗成十年，好難得遇上佢，是緣份吧！今次好匆忙咁去到登機閘口，只有三分鐘嘅短敍，都覺得開心；想見的話就算是短短幾秒，也會滿足！不想見的話，一秒也覺討厭！你會係咁嘛？！