回到啓德時代

今晚參加咗一個好特別嘅聚會，就係同一班啓德時代嘅BA team聚一聚，當中只有數得出嘅三個仲响渣甸做，其中一個當然係我啦！其他已經各散東西，有啲名我都唔記得，淨係認得出好熟口面，不過一講起阿邊個邊個就會"哦"一聲，記得返晒！話時話Jory真係好勁，揀咗一個好地方俾我哋聚，又揾到咁多人出嚟，真係好多謝佢！其實今次嗰party係BA team check-in counter同事嘅聚會，查實我又唔係做過check-in counter，只不過係做過BA嘅CSA三個月咁大把，Jory話係BA team就歡迎，我就唔客氣，一齊去懷念一番過往趣事！回憶吓當年三大BA PDO嘅威水史...哈哈！咸旦黄，你都係冇變過，一樣係咁風趣！希望遲啲又可以出嚟聚一聚啦！

生日禮物

生日禮物呢個話題，其實應該响琴日講吓，就係因為冇收過禮物，所以有嘢好講！不過我唔係因為冇人送禮物俾我而覺得慘，人大咗反而唔會咁著重禮物呢樣嘢，朋友同我食餐飯，講句生日快樂，都已經開心到震！今個生日好想得到，等咗好耐亦講咗好耐要買嘅單鏡反光機，終於揾到個藉口俾自己去行動，就係買俾自己做生日禮物。近兩個月都有留意各大牌子嘅相機性能同比較，加上徵詢咗朋友嘅意見，結果今日收工拿拿林去買起佢~ Sony A350嘅body再加一支Tamron A16，呵呵，開心到爆，由中學時代攞我老豆部菲林單鏡反光機同同學周圍影，到出嚟做嘢自己買部Sony DC -P5，再進化買Panasonic DC FX50，繼而再高級少少買部Ricoh GX200用嚟旁身，随時攞出嚟影，令我對攝影呢門學問結下不解之緣，小女子就响各方好友鼓勵下，再加埋自己追求滿足感嘅駒使下收養咗部DSLR，成為一個亂影一通卻偶然拍到一張精彩靚相嘅扮攝影師！哈哈！可喜可賀...下面張相就係我部A350嘅第一張作品喇！

床上的生辰

今日十二月十四日是星期天，亦是晴朗的星期天，再講就係本小姐誕辰。病菌將我綁住响張床度，咁多年嚟都未試過生日冇出過屋企門口，可想而知我個病有幾重...瞓吓起吓身上吓網...不繼循環咁做咗好幾次至等到食飯，最搞鬼就係仲要打邊爐添，十個冇胃口都要食啲啦！多謝媽咪爸爸為我準備呢餐豐富晚餐...我仲飲咗罐可樂都冇人發覺，呵呵！多謝阿哥買咗個cake我食，响呢個咁冇色彩嘅生日，加返小小甜意！最意外嘅係响FB收到至少三分一朋友嘅祝福，實在有點感動呢！响呢度我要多謝各方好友用唔同方式俾我嘅祝福，多謝送蛋糕我食嘅同事友好~~承蒙厚意，萬心感謝！

富貴私房菜

期待已久嘅富貴夜宴，終於等到喇！點解揀呢日？一嚟星期六，二嚟就係同我仲有Kelvin一齊慶生辰！有啲阻滯就係小女子病到七彩，差少少就頂唔順食唔到呢餐...好彩我意智堅定，本住條命點都要食埋呢餐至算！臨去Alfree屋企，响青衣城睇第二次醫生，攞定藥食完呢餐至開始食！
Daddy(打保齡嗰個Daddy呀！)幾日前已經浸定遼嵾，炆定花膠魚翅鮑魚，今日仲晨早叫Gary去佢屋企接佢，到Alfree屋企準備佳餚！真係唔話得！我哋四點幾五點上到去，咁啱日落，見到個黄昏靚到不得了，拿拿林攞部相機出嚟狂影...睇過都話正响呢個等食期間，我同豺狼R响到周圍影，真係超搞笑，原本死得半條命嘅我突然生猛起嚟！由於佢老婆唔舒服，都冇眼睇我哋响度搞搞震！終於等到開餐...頭炮有南乳焗雞翼，跟住唔好嘥咁食埋啲雞湯翅嘅湯渣之後，主菜出塲~~日本頂級25頭吉品鮑，嘩!糖心！再嚟主菜~關東40頭遼嵾伴花膠公扒‧鮑汁扣鵝掌，繼而半塲休息一陣，再嚟薑葱焗澳洲膏蟹同SoSo秘製生炒骨，條清蒸老虎斑出嚟嘅時候，我哋已經飽到不得了，仲有吉品鮑魚汁濃湯雞煲翅都未食，要抖十五分鐘至完成成個晚餐！不過都仲未圓滿，再嚟壓軸甜品~愛妃極品朱古力慕絲蛋糕！大功告成！多謝Daddy為我哋準備同製作呢餐富貴宴，多謝Gary伉儷借出地方俾我哋共享呢餐佳餚，多謝各位嘅祝福，我心滿意足，別無他求...安樂返屋企大覺瞓...一流！

飯局

適逢今個月係我生日，又係琛哥生日，所以約咗幾個好友去尖沙咀妹記食餐勁！話時話自己病都冇戒口住，點到食多兩日至好好休餐！我哋呢幾個識咗十幾年，近幾年都係有喜慶同大節日至會聚首一堂，當然唔係得四、五個啦！拖男帶女至少三十幾四十人，都算陣容頂盛！不過今晚低調啲幾個一齊食餐飯，傾吓計都一樂也！仲有要多謝佢哋嘅生日祝福，簡單的一餐晚飯，不需要堂黃華麗的環境，亦無需要珍餚，有你你你你這好友...病住嚟食都抵返晒！

清新。茶聚

好耐都冇特登約個朋友出嚟食個Tea傾吓計，今日放早又可以把握呢個良機去聚一聚。大家見面唔多，久唔久佢都會打俾我吹吓水，知道吓大家近況！朋友的確好多，之前講過好朋友唔駛日日見，時時講電話，久唔久聚一聚確實有清新感覺，就是喜歡呢種感覺！就好似餐枱棵咁青綠嘅小盆栽一樣...

進步

話說小女子都有一段頗長嘅時間冇進步過，講緊乜呢？之唔係我最愛嘅保齡球運動...打波對我嚟講，真係講感覺，叫我睇邊點打，企响邊度打，確實有啲虛無飄渺，所以好多時都係激死Daddy！不過今晚有啲返常，就係打出超水準，三個字~冇得彈！一個唔覺意仲俾我攞咗本週女子最佳進步獎添！嚟個大發雌威！哈哈！上週抽到個波，今週又有獎攞，還得神落咯！

追趕。黄昏

今日放工响屋企爸爸房，望見個日落好正，拿拿林攞部相機出嚟影低去，影咗兩張再望吓個天仲正，索性換衫落城門河影個夠，點知個太陽唔係好等我，落到去都幾乎冇咗一半，唯有狂拍佢嘅餘暉...好正...

豬誕

為慶祝十二月豬Ruby嘅豬誔，我哋成班同事今日晏晝去咗T2嘅潮樓大事慶祝一番，我當然掹車邊都有得受惠，因為小女子都係十二月生日。Ruby話今個月要四出慶祝一番喎，所以我哋將十二月命名為豬誕！全城慶賀，好緊要呢？！

阻住晒！

今晚返夜以為順風順水平安渡過，點知原來已經身處最危險嘅地方...話說的士加價，响機塲嘅的士站有人派發一啲單張係將市區的士同新界的士價錢比較，引起民憤嘅係由機塲返新界，搭紅的係平過綠的，你話搞笑唔搞笑？都唔知邊鬼個印埋啲單張，激嬲綠的嘅司機，發起罷駛，仲圍攻機塲
阻塞出九龍通道，包括巴士站。搞到我幾乎環遊世界至返到屋企，局住機鐵去青衣轉東涌線去荔景，再轉荃灣線去旺角再轉調景嶺線去九龍塘，繼而再轉火車入沙田，最後都係要搭多程的士歸家！全程用咗一個鐘九個字，點解咁長時間？咪就係因為班次好疏落囉！話時話好彩唔係塞住入機塲條路咋，如果唔係啲客就慘喇！...

笑星救地球

今日放早自己又去咗踩單車，回程時响孖橋見到個倒轉嘅哈哈笑天文現象，咁難得一見，唔影低真係對唔住自己！月亮、金星、木星的一個奇妙組合。莫非笑星救地球？

出手

今朝返倒塔咁早，唸住平平安安咁渡過，五點三返到公司就接到個電話，有個同事屋企人有事要趕去醫院。當然我叫佢走仲叫佢唔好咁擔心，跟住我就唸...吓？咁邊個睇嗰隻機呢又？事關呢隻唔係民航仔，而係一隻transit嘅新西蘭，睇晒所有掃把只有一個返七點嘅係NZ team，當然拿拿林打俾佢叫佢盡早返，因為隻機ETA0630，陣都成五點半，六點半前就肯定返唔到啦！最後我都係要攞返套制服出嚟，重出江湖頂住先，事關我唔係NZ team，所以都係靠晒啲同事，我去扮紙板企吓咁。殊不知隻機再遲十五分鐘，個乖乖同事又趕到返嚟，當堂鬆一口氣，返office繼續改duty...一早就搞到我頭暈，痴晒線呀！
响呢度衷心感激乖乖Frebby幫我趕返嚟睇隻NZ，今日係的士加價第一日，真係唔好意思要佢無情情搭的士返工！一切在心中...我會待你好一點！因為你乖囉...哈~

幸運是我？！

踏入一年最後一個嘅嘅第一日，幸運之神終於嚟探吓我！响今晚嘅碌波大賽中每隔一週舉行嘅抽波大賞，(即係由主辦單位ProShop送出一個保齡球出嚟，玩法就係由18條lane抽一條lane，再抽A、B、C位其中一個，仲要打到補中或全中，個波至會屬於你！)今次真係抽中我，話時話真係有啲壓力，不過皇天不負有心人，俾我打到個補中，哈哈！開心死咯...

如水

...心中有漣漪吹過　又回到最初　平靜去做我

Old Song...

小時候很喜歡的一首英文歌,百聽不厭...

Dreams are my reality
A wonderous world where I like to be
Illusions are a common thing
I try to live in dreams although it's only fantasy.
Dreams are my reality
I like to dream of you close to me
I dream of loving in the night
and loving you seems right perhaps that's my reality.

幸福

今個月的確係結婚好日子，今日又飲一餐喜酒，輪到佢~Ceci...我哋嘅相識始於工作，可能大家投緣，無論工作內外嘅嘢，佢都會同我講問我意見，佢話好鐘意同我傾計，哈！我都好樂意聽吓佢訴苦，又或者解答吓佢工作上嘅疑難，咁當然係我做到又知點做至得啦！今日到酒樓我上前祝賀佢，佢攬住我講多謝，的確有啲感動，亦十分安慰佢嫁到個如意郎君，衷心祝福佢幸福、快樂！

藍天‧塔門

繼上次向香港最東出發後，今次我哋個傻瓜攝影學會08年最後一擊，目的地~塔門。
呢個地方成日都想去，今次終於得賞所願。塔門位處西貢，話遠唔遠，話唔遠遠，哈哈...簡單啲講，由西貢市中心搭半個鐘巴士入黄石碼頭，再嚟緊接住坐半個鐘街渡就到，咁你話遠唔遠呢？
塔門的確好細，要行完成個島，我唸一個鐘都行得晒，事關我哋主要嘅目的係攝影+郊遊，所以每個景點都停留較長時間。最鐘意嗰度山上面有塊大草坪，面向大海，令我感覺心曠神怡~~嘩，小學作文佳句！最開心就係有我最愛嘅藍天，行到邊都份外開心。下面張相用腳將部機伸延到中間較時間制影，超高難度，因為又曬又大風，影出嚟效果好滿意，個個表情不一。


有啲可惜嘅係食唔到海鮮大餐囉，因為島上唯一嘅海鮮酒樓個廚房裝修緊，唯有移玉步過隔離茶餐廳揾嘢食，點知又有驚喜大發現，就係食到呢間餐廳最出名嘅海膽炒飯同埋無冰凍奶茶，確實無介紹錯！

聯誼

公司一年一度嘅大閘蟹蛇宴又開鑼，由於上次同老細搞個生日會氹得佢好開心，所以佢包咗一圍俾我哋大刷特刷！~唔好以為好貴，其實五十蚊一位，因為公司包底！基本上食蟹都係其次，主打都係聯誼一吓！臨走仲俾我以前個部門嘅同事叫埋一齊影大合照，突然好留戀以往做機嘅日子......

老豆、牙醫、靚太與我

難得今日放假晨早起身同爸爸媽咪飲茶，事關今日我老豆生日，咁梗係要請佢飲茶啦！一早就唸住今日去劉醫生度洗牙，點知我老豆又話要去，佢話啲牙痛喎，所以飲完茶，上咗去拜吓阿爺阿嫲就雞咁腳走，嘩同我老豆行，真係辛苦，平時人哋話我脚長行得快，我老豆仲行得快過我兩倍，佢行我係要跑囉，媽咪仲叫我跟住佢，我真係跟佢唔住...跑到超索氣！
去到劉醫生度，佢都係响度歎緊茶，睇緊唔知乜嘢玉石書。劉醫生話我啲牙好健康，我都覺得係，因為我好少流牙血同牙痛。唸起次响度剝智慧牙剝咗兩個鐘仲要一路剝一路照X-ray一路打麻醉針，剝到劉醫生要冲杯茶抖，至剝到隻打橫生不突止仲周圍遍佈神經線嘅智慧牙，真係好經典，事後仲俾咗五日病假我，因為塊面腫到豬頭咁，實在難忘！
上回個特別任務仲有三成未搞掂，所以約咗靚太去完成任務。最開心就係去咗Haagen-Daz食咗個Ice-cream tea set...超抵食加超好食...下次要再食過，不過要帶埋佢兩個女，更加開心！完成任務後火速歸家同老豆食飯，市道真係麻麻，平時都會滿坐嘅利苑，今晚大把位囉...食飽都仲要食多個粟蓉西米布甸~次次想食都冇，今晚終於食到lu...

Fun Fun 星期一

今日早咗少少咁多去練波，事關技不如人，所以加咗少少決心去練習練習，同我一齊練波嘅有~豺狼Ronald，唔知點解佢個波點解可以咁走，Daddy話佢成日擰手(呢個Daddy係我哋Team嘅隊長，人人都叫佢做爸爸)，叫我唔好學佢喎！哈，豺狼R當然唔會理啦！照教可也！睇片~
係咪好似好勁呢？！哈哈！
今晚比賽，我同豺狼R响度衰玩相機，搞到Daddy對我哋有啲不滿，但係我哋都照玩可也！激死Daddy~~呵呵呵...
豺狠R:你就好啦，Daddy車我返屋企嗰陣係咁哦我呀~莫非嫦娥上身？！年青人~~放鬆啲啦！

消遙遊

今日收早無事忙，火速歸家想去踩單車，同事問我咁趕做乜，早啲去踩早啲返嘛！本來唸住踩去三門仔食碗牛腩撈粗，唸唸吓都係唔好食，直接踩去大美篤個水霸，竭一竭就回歸，今日雖然好好太陽，但係一啲都唔覺熱，有點秋意，好爽！踩到去水霸同隻飛行服務隊嘅直升機相遇，因為佢要响水塘吸水去馬鞍山救山火，我坐响度十幾分鐘，佢來回走咗三轉，心唸其實係咪咁有效？！條火龍咁長，值升機儲水量有限，都唔知要走幾多轉至救得熄！不過如果唔係佢嚟吸水，我都唔會見到彩虹！對上一次見到彩虹，應該有三、四年前响機塲晨早做完隻早EK等Push back嗰陣咯！嘩，影咗兩張相都差不多五點，依家個天好快就黑，拿拿林踩返屋企食飯lu...可能耐冇踩，返到屋企成身好似虛脫咁...

特別任務連!?

今日突然收到個求助電話，就係有個阿太要去Ball，問我著乜好？！話時話我咁大個女都冇話去過啲咁Formal嘅Ball，著乜好突然間真係唸唔到，仲話下星期五就係，事關唔係話買就買到啱心水家嘛？平時佢仲係著慣便服，有一身古銅色嘅肌膚，真係有啲難度！所以我叫佢俾幾個鐘時間我唸，就响我收工前突然靈光一閃，決定瞓少兩個鐘都同佢去銅鑼灣走一轉，又當然我要咨詢吓靚媽嘅Budget，至睇吓好唔好去我最愛的Boutique睇吓有冇好嘢！話時話我都有一段時間冇去買過衫，事關一入去就不得了，因為最熟識我品味嘅阿B，次次都响Store Room攞一堆衫出嚟俾我試！今次未入門口就見到佢，即時要嚟個擁抱！實在太耐冇見了！當然我立刻表明來意，就係為阿靚媽裝身喇！佢二話不說就攞咗好幾條出得吓大塲面又比較隆重嘅裙出嚟，當然火速要試吓啦！當佢試咗條黑色Tube Dress，我同阿B一致認為呢條無得頂，大方得嚟帶點高貴，簡單得嚟又帶點華麗，唔駛唸咁多，就買咗呢條裙，再加件白色兔毛毛披肩，嘩！即刻掂晒...由於時間關係，下星期再約佢去睇鞋，哈，佢話買衫呢家嘢，唔揾我都唔知揾邊個好，唔係掛，我唔係做開image呢家嘢喎，哈哈！今次呢個特別任務，都叫做成功咗七成！餘下三成下星期必定完成...因為冇難度囉！我好鐘意呢件褸...

萬千星輝賀~壽星公s

今個十一月之星，有我哋老細同小關，當然我哋一定會搞個小食會賀一賀佢哋啦！自從過咗MP，呢一類搞作通常由我去主理，由訂餐準備以至攝影，簡直係全包宴一手包辦！今次為求方便，梗係叫咗我哋嘅至愛Pizza & Chicken啦，訂埋個蛋糕，簡直係完美！小關話响公司做咗咁耐都未試過有人同佢咁樣慶祝生日，好感動喎！老細都開心到見牙唔見眼！至緊要係大家開心啫！祝佢哋福如東海、壽比南山！

深秋刷、刷、刷BBQ大行動

秋高氣爽，最好就約埋班朋友BBQ，BBQ去邊度好？最好就係去Daddy度(Daddy係我哋Bowling Team嘅隊長，人人都叫佢做Daddy！)點解去Daddy度好？原因好簡單，佢屋企夠大有個花園可以BBQ，，選料上盛唔在講，至緊要係Daddy整啲嘢好食，真係冇得頂！又事關今個月有兩個壽星，順便同佢哋慶祝慶祝。本來唸住踩單車入Daddy度，咁好太陽做吓運動都好，點知靚太要求，要買個雪糕蛋糕去，咁即係唔踩得，事關我未有咁好技術單手踩單車囉！最後買咗個超好食嘅比利時朱古力雪糕蛋糕賀吓靚太同豺狼！
次次去到，Daddy都例必準備成箱生一齊食，今次仲有佢嘅超彈牙手打墨魚丸，頂級肥牛同特級帆立貝，差啲唔記得仲有雞煲翅添，一流！淨係坐响度食都食咗五個鐘，超誇！臨走前仲相約下次去Alfree屋企，Daddy親自下廚整餐富貴中菜我哋食，順使慶祝十二月生日嘅我同Kelvin！期待期待再期待！

老友

今日放工百無鳥賴，去電咗一個好滿意嘅髮型，走咗去中環揾我個十幾年老朋友食飯，佢响中環一間賣高級珠寶首飾店做嘢，我去到只會window shopping，呢個係當然嘅事，一嚟我唔係富貴，二嚟就算有錢都唔會買囉......(唔好意思率直咗少少，事關款式都唔啱我，哈哈！)由於佢收七點，所以我逛咗中環一陣影吓夜景......超無聊得嚟又帶點充實！
我同Christina唔會成日見面，雖然香港唔係大，但係都試過三個月冇見過，過我哋久唔久都會通電話講吓近況，同佢行街就最好，因為佢最知我心意，有時候會有好嘢益我！哈哈！今晚同佢去咗間日本拉麵店叫麵屋一平安，啲拉麵同响日本食嘅差不多，係超正！話時話Christine都帶我試過好多好食嘅哋方！
記得上次旺角四級火，我唔知個確實位置，淨係知响佢屋企附近，即刻打俾佢吓佢有冇事，打兩次都冇人聽真係嚇死我！好彩佢之後打返俾我至知佢冇事，當堂安樂晒！好朋友的確唔需要時時刻刻見住，好似我同Christine咁，就係一個好例子！

感動你

好少有一個男仔咁細心，細心得嚟又有啲騎呢，古靈精怪樣樣都識啲，又識氹人開心，講緊邊個?咪就係我哋個小小攝影學會嘅會長Tony。今日係佢嘅大婚慶典，包晒全間酒樓做酒席，塲面虛陷都不得了，仲熱鬧過春茗！
打從成年前知道佢結婚，都已經好戥佢開心，嗰陣網上流傳咗佢求婚嘅一段短片，對佢簡直另眼相看，我以為做戲至會有嘅情節，响佢求婚嗰陣，做咗出嚟，就係响 佢老婆生日日，搞咗個Party，自己製作咗一段video，跟住同兩個friends落街舉起〝嫁俾我〞嘅banner，你話係咪勇氣可嘉吖？！睇先 成個短片，真係歎為觀止！唔應承都唔得啦！
成個婚宴，最欣賞係佢自己做嘅短片同一本好精美嘅Magazine，如果一百分滿分我會俾三百分。參加過好多次婚宴，做得令人感動嘅我唸都係佢呢次，就連 Tony自己都感動得流好幾次眼淚，有咁多親朋戚友嘅支持，都今生無悔啦！我相信Tony一定會好錫好錫佢老婆，願佢兩口子幸福快樂！
P.S.我老豆話我咁病就唔好去飲，不過我冇聽佢講呀，結婚係人生大事，能夠參與感受喜悅，少少病又算得乜嘢吖!!

珠姐、再見!

珠姐係我哋公司嘅一個類似Assistant嘅人，主理Airside嘅大小鎖碎事務，上至Escort重要人仕入禁區下至洗杯，中間仲要管理清潔公司派嚟嘅人，亦即係檢查人哋搞清潔搞得好唔好，妥唔妥當，每星期六會過嚟我哋呢面影印下星期嘅flight movement。上個月得知公司要珠姐退休，事出突然，的確有啲唔捨得，事關珠姐都同我哋傾得兩句，佢成日用啲上海話夾雜住廣東話同我哋講嘢，有時真係唔係好明佢講乜！我就會學佢講嘢講唔正同佢玩，部油印機一唔聽話，珠姐實叫我去幫佢整吓，其實我都唔係好識，搞搞吓又搞得掂，珠姐就會拍手話我好嘢，真搞笑！臨走前佢仲帶埋相機嚟同我哋影相添！不過珠姐都有返咁上下年紀，係時係退休，希望佢活得開心，身體健康啦！珠姐~保重呀！

喜喜

今個月特別多人嫁娶，單係收帖都有三張，一向以嚟去飲喜酒呢個活動，除咗係恭賀一對戀人升華成一對夫妻之外，亦係聚舊嘅好地方。今次請我飲嘅係我識咗都有十五、六年嘅朋友文仔，終於拉埋天窗。初初仲驚去唔到事關屋企之前有白事，所以唔係咁好意思去，驚唔係咁好，中國人迷信吖嘛，點知我email問佢，佢一啲都唔介意！實在太好.....點知我前日一起身發覺有啲唔對路，喉嚨痛得要死，嗰晚仲開始發燒，真係有啲擔心見證唔到佢哋嘅喜悅！
文仔係我一個响體藝嘅同學嘅同學，即係佢係我同學响TI嘅同學，有緣相識到依家都成十幾年，佢係一個超級好人，一直以嚟佢都好關心身邊嘅朋友，雖然大家唔係成日見面，但久唔久都有互相問候。基本上我呢班朋友，每年聖誔前夕都會BBQ聚會，而每逢圍內有喜慶，至會有機會眾一眾，佢哋有部份人有時夜晚會去飲酒，不過我參與嘅次數近乎零，因為我唔飲酒！哈哈！而每次喜宴後都會有餘慶節目，當然今晚唔例外啦！主人家強烈邀請，生理狀況還許可下，點都要去露一陣面，人哋响度飲酒，我就飲熱檸茶，好搞笑囉！坐咗一陣事關我真係頂唔順，唯有先行告辭啦！文仔嗰一刻已經有啲醉，响我同佢say goodbye嘅時侯，佢喊咗出嚟仲話之前好驚我嚟唔到個婚宴，話好開心我嚟咗，嗰一刻我都唔知佢係咪酒後吐真言，佢仲話我哋呢班朋友好差，出親嚟都係飲到爛醉，好少出嚟去食飯傾計，佢話好多嘢想問我，一定要約我出嚟食飯傾計，梗係好啦，唔飲酒就得喇~~好期待下一次聚會呢！

投恆狀夜宴

我哋嘅歌王今年廿四歲生日搞咗個盛大賀壽晚宴同卡拉OK Party，好榮幸我係被邀請嘅一位，一收到Facebook嘅invitation，絕冇猶猭就決定去捧塲啦！值得一提嘅係上圖嘅invitation card，由阿歌王親手續張寫，咁有誠意喎!何況我病到七彩，都一定會支持！不過我真係好欣賞佢嘅製作，簡直滿分！今晚真係陣容鼎盛，估都估唔到有成六圍酒，嘩！成七十二人一齊賀佢，真係鄧佢開心，因為我咁大個女都未試過有一個咁多人參與嘅生日Party，就好似擺大壽咁！不過好可惜去唔到佢嘅卡拉OK Party，事關第二朝返晨早，夜晚又要出席另一個喜宴，响呢度要祝阿歌王事事稱心，日日笑口常開啦！
P.S. 當我見到呢張invitation...唸起〝頭痕〞狀...頭痕點樣著靚啲影靚相乎!

綠化

自從搬咗新Office之後，不見天日，要望出窗外停機坪就要行去後面尾房嘅位置，對於我哋呢啲成日望住都電腦嘅人嚟講就真係慘，望得耐個芒想望吓窗外風景就真係難啲！襯今日收早拜會完師傅之後，走咗去花虛行咗一轉，當然大有收穫啦！由於要攞入禁區，要照X-Ray，所以唔買得啲有泥嘅植物，咁最合心水嘅就係水種植物啦！行行吓就買咗三種植物喇，第一種就係開運竹，呢個係詢眾要求，要開運喎！第二樣就係金錢葉，又係貪佢大吉大利囉！第三種係一棵唔記得叫乜嘅葉，老板娘話會開枝白色嘅葉出嚟好靚喎！~睇吓點！？依家Office有返啲生氣(唔係嬲嗰個生氣，係生生猛猛嗰個生氣呀！)做嘢都精神啲啦!

熱烈慶祝

如果有睇開我個Blog嘅話，應該知道我公司隔離部門有個超級眼紅人，投訴過我哋响度煮飯食呢?記唔記得呀?嘿！今日返到公司，我老板淨係講咗一句〝釣魚臺主權回歸〞，哈！你真係估佢唔到，原來係講釣魚臺〝煮〞權回歸，據消息透露，我老細同頂頭老細開會，提及煮權呢個問題，點知俾我哋個金牙老細講返個煮權返嚟，事關我哋一齊食飯，大家嘅感情增進咗好多團結咗好多，仲將個工作時間加多咗，因為一個鐘都唔夠，個個食飽就即刻埋位做嘢(我哋食半個鐘飯咋！)。以後我哋可以名正言順咁响Office用飯煲煮飯咯！我老細仲話要大事慶祝加多兩個餸添......即係整蠱我...要我唸多兩味！！老細，你係得嘅！

你好!白泥

下白泥呢個名字對於一般城市人嚟講的確係一個陌生嘅地方，而對於我嚟介乎熟識與陌生之間。因為唔知响幾時我已經知道嗰度睇日落係最正，不過從來都未踏足過。咁啱今日收早，最好就係去走一轉。初頭响FB問有冇人有興趣去影日落，有人有興趣不過時間唔啱，最後就同咗個朋友兼同事一齊去。去之前上網睇過吓人哋啲心得同埋注意事項，check好晒交通、潮汐漲退同日落時間，再响元朗買定對膠拖，咁就掂晒！由元朗坐小巴經流浮山到白泥大概要半個鐘車程，可能係星期五嘅關係，落車只得我哋兩個女子同一雙情侶。而行出泥灘，係冇人嘅。我哋行咗一陣就換咗對拖鞋著，因為對鞋已經成腳泥！今日個太陽一啲都冇偷懶，仲非常合作！今日有嘅係太陽、藍天、微風、仲有少少白雲！其實下白泥就係响流浮山再入啲，而下白泥亦有好多哋方係用嚟種蠔，我哋行落泥灘，有好多寄居蟹同小蟹，灘上有紅樹林同埋一啲樹苗，樹苗排列得好整齊，而樹苗嘅另一面有啲蠔排，當我哋行過去嘅時候，踩上咗一啲原來好軟嘅泥，雙腳即時被吞食入去啲泥度，抽都抽唔起隻腳，好狼狽至逃出泥濘！不過有隻拖鞋俾啲呢食咗，想唔要又好似唔係好得，最後都抆返上嚟！我依家至感覺到乜嘢叫做泥足深陷，死裡逃生！哈哈！
唔去過都唔知原來西部通道就係响白泥附近，白泥嘅對面就係蛇口，原來今日我差不多走到香港最西呢!
今日終於得嘗所願可以嚟到呢度睇日落，望住個太陽慢慢向下沉，又唸起句名句~夕陽無限好，只是近黄昏。為咗留住美麗嘅一刻，腳架都借埋去用，影出嚟啲相唔知係咪叫做靚，不過都算滿意！
如果再有機會去多一次，希望會係同我的愛人去啦...浪漫啲嘛...

絕對靠得住

對於中國嘅四大發明，你又知幾多呢？其實我都冇乜點深入研究，唔好以為我係講指南針呀火葯呀之類嘅嘢！今次講嘅中國四大發明係粥、粉、麵、飯嘅頭炮~粥。一向以嚟我都好鐘意食粥，而我舅父响唔記得幾多年前响灣仔喜帖街開咗間粥店，名為靠得住，後來因為市區重建計劃之下，搬到依家嘅位置。以前有時候無聊，都會去舅父度做吓義工，不過我淨係識收錢同埋食。唔經唔覺佢間舖都至少做咗七、八年，我舅父成日都話好多達官貴人去幫襯佢，呢個我都信，事關我都見識過吓。每次打俾舅父，我都會嗌靠得住，舅父都會應我一句〝絕對〞，我成日都叫佢低調啲，佢次次都會話低調唔到，激死！最近金融海嘯下，對佢嘅生意有冇影響我就真係唔係好知，但係最大單嘅事莫過於佢將間舖連靠得住個名賣咗俾香港一間飲食界大集團，亦即係舅父唔駛再對住班嘔血伙記！由於佢話响十一月就會將間舖交手，所以襯今日過開香港，就去懷緬一番！叫返碗我例會叫嘅豬膶魚鰾魚片粥同細細碟魚皮，下次再嚟就要俾錢食喇！哈哈！唔知舅父又有乜大計呢？一定支持！

雕鑽

一向以來練波對我嚟講真係有啲嘥氣，事關我唔覺意回想一吓過去打出嚟嘅佳績，我都係冇點練過波就打出高分數。正所謂讀書不是求分數，打波對我嚟講係咪又好似讀書咁呢？係~~不過只係我打得衰嘅時候，用嚟安慰自己嘅一種方法，有少少自欺欺人呢？冇錯！的確係嘅！今晚又一次對住我哋嘅宿敵~一二；對於佢哋嚟講，相信佢哋有無比壓力，事關對上一次佢哋對我哋攞得兩大分，今次佢哋如臨大敵，誓要斬返我哋一頸血一樣！而我嘅心情，的確好輕鬆，因為我開波前至到，同阿楚share一局，係咁易碌咗幾球，球球都係全中，我哋兩個夾埋都打27x，嚇親daddy呀!
到比賽途中，我竟然得到歡呼喝采聲，原因唔係打得出色，而係打得雕鑽，點解？睇住下面個圖，你會清楚啲！
@7@8@9@10@
@@4@5@6@@
@@@2@3@@@
@@@@1@@@
第一球打剩6、10分平，我唸住碌個波出去响6嘅右面薄薄刷過之後個波會撞向10，殊不知兩個樽都打唔到，竟然啱啱好响兩個樽間碌過！有冇搞錯？咁難都俾我打到，在塲人仕拍爛手掌！開心嘅事的確唔停得，到第二格打淨1、3、6，照理打1、3位就可以補中，殊不知我淨係打個3，超雕鑽，亦又一次令大家目定口呆！
好耐有試過打得咁高興，今晚全隊攞咗34分！交到吓功課，仲打到局225...心滿意足呢!

斷絕來往

〝斷絕來往〞呢四個字對我嚟講係有啲悲，無論你對人講，又抑或人哋同你講都好，講得出呢四個字，都一定發生過一啲你自己認為不能容忍和原諒。最近有個朋友响FB度講話~ 究竟什麼原因會令一個人從facebook delete了你??~~按一下delete的確好易，當然有啲人經過深思熟慮去delete一個朋友，有啲人意氣用事delete一個朋友，亦有啲人因為小氣而delete一個朋友。對於將一個人從自己嘅生活圈子delete出局，在我而言是極難走到這一步，大概是充滿怨恨才會這樣做，既然是做得出這個動作，也就是連朋友都不如。要做這個動作對我來說也需要很大勇氣吧。人沒有包容忍耐和寬恕，便不會快樂。世上沒有人是完美，只可以盡量做到最好，別太過在乎別人怎樣對你，要在乎的就是自己怎樣對人。當你决定跟我斷絕來往的時候，請跟我說一聲，也請將我的所有包括msn、facebook、電話等等，都一併刪除，好讓你的美夢成真！我不會介意，亦會好尊重你的決定。至少在我生命中，也有過你的腳印。朋友我當你一世朋友...

超級無敵>>好好先生

今日要為大家介紹嘅係一個好好先生，佢响我哋部門係最靠得住最幫得手嗰個，有乜唔識有乜難題，佢都會好耐心好細心為你解答，千祈唔好以為佢係一隻悶蛋，响大家聚精會神咁做嘢時，佢必定有啲搞笑嘢講，氣氛當堂輕鬆晒！講到佢老婆就真係幸福到不得了，睌晚都煮飯俾老婆食(咁當然都會出街食啦！)，嘩你唸吓平時佢收工最早都要六點幾啦，一放工就話趕住返屋企陪老婆，駛唔駛咁浪漫呀？真係羨慕死人呀！佢老婆會嘅預產期响呢幾日，而佢亦會暫別我哋呢個大家庭一個月，呢個準爸爸做足晒一切準備，連老坐月要食乜補身都知，真係冇得頂！佢响暫別我哋之前，整咗樣好搞鬼嘅嘢，就係一張張order多士嘅form...

事關我哋晏晝三、四點就會嗌肚餓，一個整多士就個個都話食，邊個整？咪就係我囉！佢話方哽我落單喎！！激死人囉...茶餐廳咩？...不過又真係幾方便嘅，唔會漏單嘛！唔好話我唔介紹你哋食好嘢，原來奶占多好好食！...搞到我食上！
好喇，我响度祝郭Sir個老婆生個聰明伶俐嘅B女，最緊要健康快樂啦！我哋會攬住幾係尿片上去探BB！

陪玩陪跳陪...

我個好師傅最近又有新意思，當然要拖埋我落水啦~就係叫我陪佢去舞走脂肪，跳Frunky Dance喇！今日去試玩一堂，晨早就要起身滕出九龍同佢去跳，都幾痛苦。去到上堂嘅地方，當然全部都係女士啦，因為lady only嘛。一堂個半鐘，俾我嘅感覺有少少虛脫，事關九十分鐘跳足八十五分鐘，導師絕無欺塲。我哋兩個都係第一次去跳，手腳真係唔係好協調，有時跟唔到個beat，好搞笑，有啲時間我係有啲〝搾流攤〞，骨頭硬冇法啦！最妙嘅就係出咗一身汗同連續迫住自己要係咁响度跳，假以時日，應該會有啲啲成績啩？！
跳完舞仲要等成個鐘後至可以食嘢，結果我哋去咗澳洲牛奶公司食咗個快餐，可能係撞啱Lunch hour，多人到不得了，其實係無時無刻都咁多人至真，因為度啲炒蛋正到漏，件多士又厚又烘得啱啱好，啲奶茶又香滑，真係無得彈！仲有啲伙記又熱情又有禮貌，唔讚過佢都唔得，師傅話下次又要去食過喎！

食飽唸住搭車返工，點知有架的士停响我哋面前，話載埋我哋收平啲四十蚊位，初時我哋不為所動，因為我哋唔趕時間，亦貴過我哋搭車，之後至話我哋係機塲職員至收廿蚊位，咁梗係跳上車啦！佢都係入機塲接客，所以有佢著數啦！

少理...

話說我前幾日放咗兩日假，公司發生咗兩件小事同一件大事。嗰兩件小事就係佢哋晏晝煲咗兩日飯，兩日都煮到生米！？Technical入邊個數？唔好意思，總之就係入阿邊個數啦！另一件大事就係有個小人投訴我哋响辦公室煲飯同開飯，呢個小人係坐响我哋隔嚟嘅JATS L & D嘅，出咗名小家兼鐘意做埋啲唔係人做嘅嘢，又例如偷偷錄低我哋其中兩個同事嘅對話，根住去投訴話工作時講埋啲非工作範圍嘅嘢。係咪有啲搞笑？一時就投訴我哋嘈，唓！我哋不嬲都係咁啦！我又唔覺得有幾嘈喎！對於佢一切嘅所作所為，我哋真係好少理！飯照煲，餸照帶，話照講！我唸佢會難受啲，因為得罪咗我哋...日日都有說話俾佢聽，尤其係我老細，真係無得頂！
就呢件事反而令我哋更團結，因為我哋唔會向惡勢力低頭！少理佢...

灰飛煙滅

今天要送你最後一程，看見你安詳的睡著了，我不得不接受這個事實。這兩天一直也叫自己要放鬆一點，我的確放鬆了，但是有一刻淚水湧出來，我是捨不得你。又...這兩天對著火爐喃喃自語，你可會聽見我跟你說的話嗎？
嫲...請不要怕孤單，願你一路好走...

指南針

自小便有著超強的方向感，打從兒時家住北角，記得當年我考進蘇浙幼稚園，媽帶著我和哥一起到學校辦理各項入學事宜，校園的確很大，因幼稚園跟小學的中、英文部也在同一校舍。當時我在蓋操塲，媽叫我和哥在那裏等她，轉過頭哥不知跑到那裏，我當然沒有乖乖站在原點等媽回來帶我走，明明我就是一個跟家長失散的小朋友，我一也不明白自己為何不找老師幫忙，自己走了兩圈找不到媽和哥，便作了一個人細鬼大的決定~~自己行返屋企。當年只得三、四歲的我，由炮台山半山行落英皇道，再向柴灣方向走，橫過多條馬路，走過巴士廠，經過健威中心再過一條沒有交通燈的馬路，沒多遠便到了我的家~消防宿舍，全程大概要廿五分鐘。回到家還要徒步走上七樓，是因為我未夠高去按電梯裡的按扭，真倒霉。未回到家門，嫲已經站在門口等我，爸也從消防局處回來，嚇得他們半死！是否有點恐怖？回想也覺得危險！從此以後便為自己定下了一個稱號~小小指南針。記得又是小時候，姑媽總愛帶我到處遊，每帶我去一個地方，我便會深深印在腦海。成長過程中，最愛閱讀的也是地圖，無論香港街道圖又或是世界地圖，我也同樣愛看。工作裏常接觸來自世界各地嘅人，有時同事會問那地方在地球那一個位置？有時講也講不明，不是我表達能力差，而是他們心中沒有地圖，講得怎樣精采也徙然。哥從事汽車衛星導航系統，在他車內有他的寶貝TomTom引路，也非常準確呢！現在偶爾也在Google Earth流覽，是說不出的樂趣無窮。在我身邊的人，從未遇過像我一樣的愛看地圖的人，唯獨是你，是巧合吧！

小小小管家

自從搬咗office之後，我哋Team人更加團結，事關依家Planner同我哋Real Time坐埋一齊，Office入面氣氛熱鬧咗好多，同埋最緊要係我哋有個Pantry，簡直係拉近我哋嘅距離！話說有一日關仔提議不如人人夾錢買電飯煲，再輪住整餸返嚟一齊食，事關日日出去食飯食到冇嘢好食，大家嘅反應就係舉腳贊成啦！一連串嘅大計走晒出嚟，又話買搾汁機多士爐焗爐電磁爐...嘩！係咪痴咗線呀！買搾汁機唔該揾人去抬兩箱蘋果橙返嚟先！所以可以不理！最後Jovy响屋企攞咗個電磁爐同邊爐煱返嚟，事關佢話放响屋企極少用，所以奉獻出嚟增加使用率。最後我哋買咗個有信心保証嘅多功能電飯煲同一個小小焗爐，令呢個小小Office打造成一個五星級嘅Office！
作為一個小管家嘅我，當然唔會令佢哋失望啦，要準備十幾人用嘅碗筷，調味料一應俱全。我唸响機塲最Pro嘅Pantry真係非我哋莫屬！我哋嘅第一餐飯，未開飯先興奮，事關要煲十幾人飯，真係有啲緊張！煲好飯攞出嚟嗰吓好似上台表演咁，個個都望住你~~煲飯咋!結果係點？超成功囉！第二日嗰餐仲正，有我哋老細洗碗！你話我哋相處係幾咁融洽吖！...
有埋個焗爐，下次想整芝士焗西籣花添呀！未整唸起都興奮！