別再為他流淚

...就別再為他流淚 別再讓他操控妳的傷悲
就算有一點愚昧一點點後悔 也不要太狼狽

他不值得妳的淚 把那遺憾留在大雨的街
妳曾在迷失的旅途中盲目追 以後為自己醉
(以後管他是誰)

每段感情都非常珍貴 他的好妳就放在心扉
記得有個人曾讓妳那樣的心碎

妳笑了照亮夜幕的黑 什麼夢都不比你的美
多少年以後想起他還有些體會 那些妳已無所謂

禮儀師之奏嗚曲

今天選擇了這套奧斯卡金像獎最佳外語片，點綴了今天。在偶然間看到以下文章，說得感動也令人感受到那種情，所以在此轉載，分享分享...

〝用溫暖的雙手去撫摸那已變得冷冰的肉體，讓失去靈魂的肉體再次感受到我手心的溫暖。雖然肉體已失了的靈魂，雙眼和雙唇是緊緊的閉著，但您的臉容仍舊是那麼熟悉。當我看到你，還以為你只是睡了而已，待會兒，你會醒來。可惜，並不是想像那樣，你真的走。了‧‧‧‧‧‧

《禮儀師之奏嗚曲》以輕鬆和嚴肅的手法描述禮儀師的工作，利用禮儀師這職業去探討生命的意義。主角大悟曾是大提琴樂師，不過在命運安排下，他卻當上了禮儀師。人生的轉折是不能控制的，今天你最喜歡的工作也許真的不是你終身的職業，人有時候真係要接受命運的控制。這就如是生死是我們能力範圍內不能去控制的，生死是無常的，而命運也是無常的，它要變就變。

而人在生命裡總會遇上太多的生生死死，而死亡是不能逃避的，這是生命必經的階層。《禮》出現許多家人哭別先人的場面，他們捨不得親人的離開，同時他們也覺得自己在親人在世的時候，慚對親人，從不願意去付出自己的愛。當親人離去後，一切已來得太遲，生命是不能用淚水去挽回的，我們該珍惜眼前的幸福，因為幸福是不知在哪一刻溜走的，而哭別只是一種沈痛的思念。

《禮》最讓我感動的是主角大悟替生父納棺時，他憶起兒時父親與他交換石頭信的畫面。雖然石頭是不會說話的，但大悟的父親會以石頭來傳達自已的心意，粗糙的代表擔心，而光滑的則代表開心或放心。心頭信傳達我們心裡說不出的愛和溫柔，沉重的它代表我們心中對家人的牽掛，不會說話的它就像「一切盡在不言中」，它雖然不會說話，但它粗糙或光滑的表面代表著我們向家人表達的心意。

有時候，我們想常什麼是生命。生命是燦爛的，還是痛苦的？為什麼我們沒有權力去選擇自己活著的方式。生死又不是如片中的老伯伯所說的，死亡只不過是通往另一個世界的過程，這是必經的階段。我在想假設死亡只是為通往另一個世界的階段，那為什麼我們這麼怕死？人總要一死，為什麼不期待它早點降臨。

我想，也許是凡塵俗世中有太多我們人類放不下的情感。我們放不下身邊的家人和朋友，放不下多姿多彩的生活，還放不下自已一直在追尋的夢想。

鮭魚在出生後，離開自己的孕育之地，奔向大海，然後牠們會返回自己的出生地繁殖下一代，最後死亡。為什麼牠們必定要回到自己的出生地呢？也許，這是鮭魚選擇的生命，你從那裡來，就會回到那裡去。生命是否燦爛是過一個過程，每個一的命運都不一樣。但當你死去後，一切都會打回原形，你會變回原來的你。

生死的問題不想再說太多，在此罷了。

另外，《禮》片還道出了梁啟超所說敬業與樂業的重要性。在此引用一段《敬業與樂業》的內文，「凡職業是沒有不是神聖的，所以凡職業沒有不是可敬的。」西方人有一個話：「擇其所愛，愛其所擇。」即是，假如這是我們所選擇的，我們必須要愛上它，並尊重它，雖然過程不一定是愉快，但你仍要把它幹好，不要因困難輕易放棄，畢竟它是你所選擇的。縱然禮儀師是世俗人的眼裡是卑賤和低下，他們認為只有不務正業的人才會做這些厭惡性的工作。但禮儀師對工作上的認真及專業，令人深深體會到職業是不應因性質而分類的，任何職業都有它的專業。正如禮儀師一樣，他們不懼怕屍體，縱然屍體是怎樣發臭和腐爛，他依然要以專心的態度去工作，不受任何影響，禮儀師不是什麼邪惡的工作，故此，它是可敬的。

禮儀師用雙手去輕撫冰冷的肉體，讓他得以安息，以最美的一面離開世界，以最溫柔的方式安撫死者的心靈。總括來說，《禮儀師之奏嗚曲》笑中有淚，淚中帶感動，感動中帶點憂傷；禮儀師納棺時的專業，令人體會到生命的可貴和職業的神聖，這就是禮儀師。〞

死亡並不害怕 ..只是塵世中有太多我們放不下的情感...

值得推介的一套好戲！

有朋自遠方來

交心嘅好朋友唔係多，咁多年嚟都有十個八個知心好友常伴在旁。前兩個星期，我有個移民咗去英國嘅好友成家返嚟香港探親，就係肥仔喇！佢好有我心，知道我鍾意影相，咁啱佢用嘅鏡頭啱晒我部機，所以一落機就攞咗個鏡頭俾我玩，仲叫我慢慢玩唔駛咁快還俾佢！
响呢兩個星期裡面，亦都係响佢朋友當中，見得我最多。從佢落機嗰一刻，同佢哋出海關，最驚訝嘅係連佢屋企人都記得我係邊個，再同佢哋一齊搭的士返屋企，幫手攞行李，上到屋企，見到佢媽咪同屋企人都好開心，為肥仔一家嘅回歸，準備好一切嗰種温暖，現塲感受晒！Auntie見到兩個孫仔孫女開心到不得了，我見到都開心！
做朋友真係講緣份，我同肥仔係從另外一個同學而相識，仲記得n年前成日成班一齊去玩去打波，經歷過嘅都有唔少；到大家日漸長大，佢成家立室，好大膽咁放棄香港嘅一切，移民到英國由頭開始。佢好坦白話唔鍾意香港嘅生活，若果留响香港一定唔會生兒育女。雖然依家唔係生活富裕，但已經好滿足。佢成日都話我係佢恩人，仲話佢啲仔女要認我做契媽添，好好笑囉，我都唔記得咗佢响英國讀書嗰陣，我幫佢還過咭數，係咩？係掛！又响度成日提起想當年冇錢食飯，都係我請，呢啲嘢在心中啦！如果你睇到我寫乜，下次返嚟唔駛再提喇！哈哈！
响攝影技術上，佢真係教咗我好多，至少冇人講過我知，我啲相點解會影得唔好，我比較接受直接示範指導，多過淨係叫我睇說明書同睇人哋影嘅相，當然呢兩樣都重要，但係對我嚟講更重要都係有人可以同我分享意見同經驗。
肥仔成日都擔心我，仲唔快啲揾個伴，仲介紹咗佢個好朋友過我識，絕世好仔嚟，我都覺得係...得啦，唔駛擔心啦，順其自然嘛！
今次肥仔返嚟好想買返隻〝女人四十〞嘅DVD，不過去到邊問到邊都話已經斷咗市，唔會再出。點知俾我响佢臨走嗰日嘅晏晝，俾我揾到，價錢唔講，揾到嗰一刻開心到不得了，要去第二間舖攞我都願呀！嗰晚仲返機塲送佢哋機，Auntie話唔好意思要我洗錢，話我好買咁多嘢俾兩個小朋友，哈，我唔開心唔鍾意嘅話，我唔會買！真係好開心見到我嘅好朋友，亦都好多謝佢一家人都當我係自己人咁親切！出年返嚟，妹妹應該識講好多嘢喇，哥哥會唔會大隻啲呢？因為佢淨係鍾意食朱古力同零食，哈！似我！
絕對明白生活迫人，希望佢嘅生意會日漸轉好，期待明年再會！

阿大夜宴

今晚阿大Diana响中環華商會所擺咗兩圍，嚟答謝我哋Jardine同HAS幫佢搞呢farewell parties！咁梗係要俾面出席啦！响一個好舒服嘅地方有好嘢食仲有一班好同事，人生無幾可！唔知到我退休嗰陣會點呢？無論如何希望阿大好好享受佢嘅退休生活啦！

花展2009

今日相約我嘅攝影伙伴Tracy去獵花，同行嘅仲有我双親同佢娘親加家姐仲有阿Miu，花展之前我哋相約一齊响灣仔飲個茶至去。由於今日已經係花展嘅第六日，賞花人當然係預料之內，唔係咁多人！所以都好易就行得近啲花度狂影，今次帶多個Marco鏡嚟試影，超鍾意呀！呢支鏡係我英國返嚟嘅好友知我鍾意影近嘢，特登一落機就攞俾我去玩，仲話借俾我玩吓先，下次返嚟至還！哈哈！你真係對我好好呀！其實個人認為啲花有少少殘殘哋，好在係有啲陽光，如果唔係真係灰！總括嚟講，影嚟影去都係嗰幾種花，自己都影到啲滿意嘅相，總算不過不失！
影完相仲叫埋Tracy、Miu同Simon一齊上嚟我屋企食飯添...為完美的一日劃上句號！

晴天。孩子天。燒烤夜

今日遇上好天氣，Pam帶Bosco入嚟我屋企等今晚BBQ之際，爸爸話樓下河畔整咗個新嘅兒童遊樂塲，所以一於帶佢哋落去玩吓行吓影吓相！小朋友真係小朋友，畢竟Bosco都係一個六歲嘅小朋友，所以見到個遊樂塲就即刻跑過去！而我哋兩個就梗係坐响度睇住佢玩啦！突然又唸起想吹吓肥皂泡，即刻打俾爸爸順便叫佢幫我買支返嚟，到手之後狂吹，吸引唔少小朋友！跟住仲幫Pam & Bosco影咗唔少我滿意嘅相啦！
到傍晚我哋就過咗我隔嚟個屋苑BBQ，又係IC同事嘅Party，又有好多小朋友嘅晚上，今晚的確招呼周到，全部嘢食都由Uncle同Auntie燒好俾我哋食！一流！我仲唔蝕底咁叫埋我双親一齊過嚟食！哈哈！我唸最開心都係班小朋友，一玩吹波波個個係咁跳，搞笑到不得了！

遇上小淘氣

原本二人茶聚，卻多了一個小淘氣，就係阿Ling個小姪女喇！晴晴只有兩歲幾，但係精靈情度超越一般同齡小朋友！阿Ling都係第一次帶晴晴去咁遠，有幾遠？咪就係大美篤之嘛！去到食咗個下午茶，就去買肥皂泡上堤霸吹波波。晴晴好搞笑，叫親佢望鏡頭笑吓，佢就會舉起兩隻手指，然後講〝笑〞！超搞鬼！吹完波波返沙田食雪糕，現今小朋友真幸福！

昏迷?!

從未試過可以瞓咁耐，由前日四點半瞓到琴日朝十一點，其間凌晨十二點幾起身熄電腦，都堅持唔離開張床；點解可以瞓咁耐？咪就係唔舒服至會乖乖瞓咁耐。成日淨係食咗個早餐之後都冇食過嘢，但係又唔覺肚餓，都好唔駛食咁多嘢！最搞笑係我老豆以為我死咗同發燒，今朝入嚟睇吓我仲有冇呼吸，又摸吓我額頭熱唔熱...其實我仲想瞓多幾個鐘，實在太凍！响張被會適合啲！

吃、喝、玩、樂‧澳門遊

好耐都冇試過一大班人去玩，今次一行十人，全程由澳門地主崔美人引路，第一站就係去威尼斯人收錢...哈哈！平生未响過澳門賭塲賭過(應該係未曾响任何賭塲賭過至真！)第一次賭嘅成績就係~攞咗少少零用錢走咁囉...今日應該有少少運氣...哈哈！
繼而我哋去咗氹仔一間好出名食水蟹粥嘅誠昌飯店食晏，基本上個人認為冇乜特別，即係唔係特別好食，價錢又唔係特別相宜；食完唔夠五分鐘，佢哋一個二個走去買燕窩蛋撻食，食完飯冇幾耐咋！仲食得落真犀利！跟住轉個灣又話食豬扒包，仲啱啱三點出爐時間，佢哋真係勁，點都要叫，仲要一人一半...OMG...飽到行唔郁呢！又食飽之後，我哋搭巴士返澳門，去潘榮記買金錢餅，入教堂影吓相再去大三巴前影張到此一遊相，好彩今次帶咗個腳架，唔駛麻煩人幫我哋揸機影大合照！點影都得，超開心！之後阿崔美女帶我哋去食冰淇淋...即係雪糕，堪稱全人手做，所以我哋揀咗幾種味嘅雪糕磚一齊品嘗！
查實今日嘅天氣真係差，陰陰天都久唔久落吓雨，食完雪糕出去就遇著大雨，買咗兩支泡泡都有機會玩！所以我哋決定買完手信，就去美高梅避吓雨...點知隻肥馬話對鞋濕晒，喊晒話要去買過對鞋，我唯有陪佢走一轉，行咗九里遠去到八佰伴至買到，仲要係淋濕晒成個人囉...返到賭塲揾佢哋一個二個都輸返之前贏嘅，搞唔掂呀！最後我哋去咗媽閣廟附近嘅一個食葡國菜好出名嘅船屋餐廳晚餐，果真一流，尤其是個菜湯，真係出色！
今次澳門遊雖然天氣唔好，但勝在有大班人一齊去，所以特別精彩！

俾面!

今日係假期第二日亦係最後一日，响Facebook見到Maranda幫佢個仔影咗啲眼仔碌碌嘅相，忍唔住晏晝上咗去佢度玩BB！哈！今次認真俾面冇瞓覺仲表情多多！所以今次影得佢好滿意！佢差不多兩個月大喇，下次天氣好要帶佢去影吓外景！哈哈！

維城歷史與藝術交融

琴晚Tracy約我今日去影相，本來唸住去馬鞍山村，不過天氣真係麻麻哋又大霧又落雨，本來唸住唔出街，但係又好似好浪費一日假期，所以決定另選地方！點知俾我上網揾到個好地方，就係荷李活道舊警察宿舍，亦即係前中央書院遺址。
以前細個家住北角，阿婆住堅道，好多時上阿婆屋企都會經過中區一啲舊樓再行條斜路上去，而荷李活道警察宿舍亦都係其中一個曾經熟口熟面嘅地方。一個以為會清拆重建嘅地方，經過民間三年來爭取，行政長官曾蔭權响施政報告中正式宣布將呢塊土地永久剔出勾地表，以作日後發展創意產業同教育之用。而其間古物古蹟辦事處更進行地下發掘，發現前中央書院嘅遺址...
第一次同Tracy出嚟影相，估唔到佢又係DSLR嘅狂熱份子，大家都係新手，所以都係亂影一餐。今次呢個開放日，有好多藝術團體响一啲空置嘅單位做咗一啲展覽同裝置藝術，所以特別多嘢影...
之後我哋暢遊中區，行吓石板街同中區警署，又係一個小時候成日到嘅地方，媽咪做警察嗰陣响中區警署守過，有時候會帶我同阿哥入去，最記得有隻識講"Hello"嘅鸚鵡！趣怪趣怪！

童心、童真、童話

今晚收夜，放工搭車揀咗坐响對母子嘅前面，小朋友大概三、四歲，以下係佢哋嘅對話...
囝囝:媽咪呀，點解啲巴士响度覺豬嘅？
媽咪:因為依家係夜晚，要覺豬囉！
囝囝:哦...好似我咁要覺豬係咪呀？
媽咪:係呀！今晚睇咗咁多車車，陣間返到屋企冲完涼就要乖乖哋上床覺豬喇！
囝囝:知道！
媽咪:睇吓幾多Airbus通天巴士！
囝囝:媽咪，乜嘢叫做通天巴士呀？
媽咪:...(靜咗，因為唔知點答好...)
我心唸:哈！個腦即時响度唸究竟點答好...
媽咪:...通天巴士係呢架巴士個名囉！
囝囝:哦...
架巴士經過小蠔灣巴士廠...
囝囝:嘩!好多巴响嗰度覺豬呀媽咪！點解响嗰度覺豬嘅？
媽咪:度係巴士嘅屋企嚟！
我心唸:又係喎！
跟住有好多車都開得快過我哋架車...
囝囝:嘩！點解啲車車開得咁快嘅媽咪？
媽咪:因為嗰啲車車食飽飽電油囉！
我心唸:嘩,咁答都得？
媽咪:我哋架車車肚餓咪行得慢囉！
囝囝:你睇吓嗰架車咁慢，梗係唔飽啦！...
****************************************************
以上嘅對話係咪好搞笑？我上車連歌都唔聽，就係因為呢個小朋友囉...

兒童世界嘅天真同單純，同成年人嘅世界截然不同...
感受到嗎？

好記得有一次响樓下，又有另一對父女嘅對話...
囡囡:爹哋，我今日好開心！
爹哋:點解呀？
囡囡:因為今日唔駛返學囉！

好簡單好直接...小朋友好容易就開心，相反成年人就...

有時候我想自己係一個幼稚園老師...