平時返工成日經過見到人踩單車嘅地方，終於有機會一遊喇！踩踩吓有好大舊黑雲飄過嚟，不過我哋都冇唸住避，橫掂都係濕，所以豁出去啦！基本上我哋成班人都好守規矩，唔會超車兼左穿右插，就係有一個哥哥仔零零舍舍突出，一嚟只有佢踩KHS(會唔會係我哋全人類都踩Dahon呀！！)，二嚟佢永遠守住第二三位，即係永遠在前！三嚟佢喜歡用佢好似想跌嘅踩車姿勢，左穿右插，遇水氹踩落水氹(我以為佢想洗吓個轆囉！)個個都留意到佢嘅危險舉動，但係個個都唔好意思話佢囉！哈，終於出事啦！咪就係明明地上面有一大堆菁苔，都起勢咁踩過去，自己炒車仲傷及無辜呢？見咗皮外傷唸住踩多兩步去到欣澳站至幫佢清理吓個傷口啦！就响嗰個時間，我用咗陳老師嘅語氣警告佢，唔准超車唔准踩得快，仲要求所有人要釘實佢！我咁做都係為大家著想，咁踩落去下次嘅受害者可能係我哋其中一個！幫佢包好傷口嘅同時，我再斷同佢講〝唔准超車唔准踩快！〞之後佢真係好聽話囉！不過就成日講住自己炒低嗰陣行緊16km/hr，一啲都唔快喎！唔係掛？！我响嗰度又濕又滑，都係踩緊3、4km/hr咋！
話咁快就踩到廸士尼嘅大門口，唔少得嘅就梗係人車大合照啦！影完相之後，我哋大軍殺入廸欣湖，食吓嘢休息吓再踩去廸士尼正門，影吓相再走一轉去碼頭同海傍就回歸！回程中又經過事發地點，阿哥哥仔竟然話有陰影，落車推車都唔緊要，最搞笑就係推車都跣腳囉！到差不多返到東涌，其中一位成員因為避狗，又炒埋落地，我用埋我僅餘嘅急救用品幫佢包好傷口，話時話每個人出車都應該帶備小小First-Aid用品，我知道自己論盡，所以一定會帶啲，有備無患吖嘛！
今次單車遊的確好玩又開心，仲有個天都幫埋我哋，真係Good呀！仲有識咗十幾個單車朋友仔，大家都對今次旅程讚不絕口，唔嚟一定後悔...的確係！期待下一次嘅單車遊...有時間一定奉陪！
