上次舊生會响學校搞咗一次廿週年聚餐之後，我哋嗰屆嘅同學仔又話要出嚟食飯聚一聚，搞手又係我，因為佢哋話我熟手技工，搞節目我搞就最好不過，承蒙大家咁俾面(其實係佢哋懶咋！)，姑且响FB出個event搞搞佢！其實邀請咗成三十幾個同學，大部份都冇預佢哋會回應甚至出現，所以理想嘅人數為十二人就啱啱好啦！而上次佢哋話想打邊爐，所以我就响
Open Rice度睇吓邊度最吸引喇！話時話揀地方呢門學問係好高深，仲好大壓力添，揀到間好食環境又好嘅大家又滿意嘅，的確好高難度；所以千揀萬揀，最後就係揀咗
小肥牛喇！佢有好多分店，而我就訂咗尖沙咀新店，仲俾間大房過我哋添，最低消費只不過係三佰幾，除咗冇特價啤酒之外，價錢係一樣，去到攞位，實在令我驚歎！睇相~
完張相係咪覺得唔錯呢？確實係幾好，房入面仲有個服務呼叫器，一按吓個制就有人嚟，服務一流，係差在電話收得唔好，事關身處地庫。
而今晚有個低我哋幾年級嘅師弟，都嚟一齊襯熱鬧，佢亦係舊生會其中一個幹事，講起佢都有啲大膽，同我哋三唔識七都敢嚟！不過我哋梗係歡迎之至啦！席間大家都講起當年响學校嘅趣聞，一眾宿生响宿舍鮮為人知嘅秘聞，今晚終於响度爆料，笑餐飽！希望久唔久都搞吓呢啲飯局，聯繫吓都要啦...通常呢啲嘢都係我包辦喇，不過我都好樂意為大家服務嘅！再者，我仲要開個post出嚟召集班嘩鬼一齊報名包枱去二十週年校慶聚餐添，又要做PR喇...
唔記得讚吓啲火煱料好正添，下次hotpot梗係首選呢度啦！
