收到誠意的邀請，今晚去到Miu個舅父屋企BBQ，事源有三位屋企人生日、七位親戚响丹麥返嚟香港渡假，加埋起上嚟亦即係十全十美的約會！？
見到Miu一家人，有莫名其妙嘅親切，初初見面已經對我好似自己屋企人咁，仲記得第一次見舅父時，佢已經話要介紹佢個大仔我識，仲攞晒啲相我睇，次次去BBQ都話要介紹我識，好搞笑。到上次BBQ時，大表哥响外國返咗嚟，大家認識咗亦故之然都知發生乜嘢事，亦即係得啖笑。今晚見到阿婆，佢第一句問我做乜咁耐唔嚟，最搞笑嘅係問佢個大孫仔有冇打電話俾我？！我話梗係冇啦，我哋一人養咗一隻白鴿玩飛鴿傳書，阿婆淨係响度笑，其實我都唔知佢知唔知我係講笑，話晒佢都成八十幾九十歲。舅父仲搞笑，話大仔娶唔到我，叫細仔娶我做二奶，唔係咁苦命掛~要做阿二，講笑啫。。。
阿姨同佢一對混血兒仔女拖男帶女响丹麥返嚟，三個小朋友好得意，兩個仔仔通屋跑，囡囡好乖坐响度畫公仔，佢哋只係識講丹麥話，所以有啲雞同鴨講。佢哋一家人好大家簇，如果齊人一定熱鬧到得了，亦俾我感受到佢哋一家嘅温暖。
之所以話有朋自遠方來，不亦樂乎！真係冇講錯。多謝你們的邀請呢！
