我的座駕係一部價值百幾萬嘅車，幾乎日日管接管送載我返工放工，正是佢~巴士。
敢講一句~我同呢條巴士線一起成長，也一起經歷風雨，因為一有呢條線我就開始搭佢返工放工，巴士司機嘅面孔早已熟識，咁多年都冇乜點換過司機，所以同大部份嘅司機都會打招呼。曾經試過我未行到個站，駕巴士响我面前飄過，心唸都係搭唔到，事關我仲有成50米至到站，點知駕車停咗响站等埋我，其實都試過好幾次喇，所以覺得自己好幸運。又試過一次放工入馬鞍山阿哥屋企食飯，咁梗係唔會响屋企個站落車，亦冇人鐘要落車，點知個司機停咗响個站度，以為我瞓過龍唔識落車等我落，哈！真細心！有時候返早，明明有人响前面排隊，駕車都會停响我面前；司機知道樓上冇位，會靜靜雞叫我快啲响樓下揾位坐，叫我唔好上樓上。今晚收工仲搞笑，司機哥哥問我係咪好眼瞓，淨間到站嗌Mic叫我起身，真細心！唔知點解唔駛返工時見到呢駕巴士，會好開心，有一次同媽咪响屋企附近見到佢，我指住大叫〝我駕車呀！〞媽咪話我痴咗，仲問我駛唔駛去搭喎？！搞笑咩？！名乎其實的日久生情呢！謹在此多謝各司機叔叔哥哥這樣照顧我，每日接載我安全抵步平安回家！
