獨行

朋友同事們都好驚奇，點解我可以一個人踩單車由沙田踩去大埔三門仔？佢哋話好慘啫，冇人陪冇人同你講嘢，會悶到爆！對我嚟講又Why not?無疑一個女仔踩去咁遠，有乜事起上嚟都幾危險，過日光日白唔怕得咁多。琴日收早，我竟然响33度高温踩出我第一步，出發前的確有啲猶猭，因為我的確驚中暑，半路頂唔順暈低call白車好瘀皮家嘛？當然我最後都排除萬難，輕輕鬆鬆嘅踩到去三門仔，到了一家小店食咗碗淨水餃雲吞，其實嗰度啲牛腩同五香鳳爪好好食，亦好有衝動想買外賣返屋企俾媽咪試吓仲想買啲返公司俾班為食貓試吓，過由於我技術有限，驚顧到盒牛腩鳳爪顧唔到自己，所以決定放棄。以往都嚟呢間小店都係同我嘅前度一齊踩單車入嚟，當然都係佢帶我嚟我至識路啦！如今自己單拖去到，感覺可一樣了。唔知點解响嗰度睇個太陽特別靚，有山有水有天有地，有詩意！回程途中，响某處影咗張相後，驚見有位我稱之為細路嘅十六七八歲嘅青年人，坐咗响路中心，狀甚痛苦。我當然有落車睇下佢係咪炒車，點知原來佢係條大腿抽筋，而佢竟然叫佢啲朋友繼續踩，佢啲朋友真係好好，真係繼續踩，一個都冇回頭睇吓佢！我冇嘢可以做到，只係扶佢坐埋一面，叫佢抖吓，我驚佢又抽筋炒車所以陪佢踩返沙田，佢同我講咗十個唔該。响護航途中，終於追得返佢啲朋友仔，我亦功成身退。我又响度唸如果我好似佢咁，會唔會有一個好似我咁嘅人出現呢？Hope so...
P.S. 琴日踩咗三個鐘，返到屋企有啲虛脫嘅感覺，繼而手脚冰冷忽冷忽熱全身乏力，精神、體力都透支了！