Daddy(打保齡嗰個Daddy呀！)幾日前已經浸定遼嵾，炆定花膠魚翅鮑魚，今日仲晨早叫Gary去佢屋企接佢，到Alfree屋企準備佳餚！真係唔話得！我哋四點幾五點上到去，咁啱日落，見到個黄昏靚到不得了，拿拿林攞部相機出嚟狂影...睇過都話正
响呢個等食期間，我同豺狼R响到周圍影，真係超搞笑，原本死得半條命嘅我突然生猛起嚟！由於佢老婆唔舒服，都冇眼睇我哋响度搞搞震！終於等到開餐...頭炮有南乳焗雞翼，跟住唔好嘥咁食埋啲雞湯翅嘅湯渣之後，主菜出塲~~日本頂級25頭吉品鮑，嘩!糖心！再嚟主菜~關東40頭遼嵾伴花膠公扒‧鮑汁扣鵝掌，繼而半塲休息一陣，再嚟薑葱焗澳洲膏蟹同SoSo秘製生炒骨，條清蒸老虎斑出嚟嘅時候，我哋已經飽到不得了，仲有吉品鮑魚汁濃湯雞煲翅都未食，要抖十五分鐘至完成成個晚餐！不過都仲未圓滿，再嚟壓軸甜品~愛妃極品朱古力慕絲蛋糕！大功告成！多謝Daddy為我哋準備同製作呢餐富貴宴，多謝Gary伉儷借出地方俾我哋共享呢餐佳餚，多謝各位嘅祝福，我心滿意足，別無他求...安樂返屋企大覺瞓...一流！
