生日禮物

生日禮物呢個話題，其實應該响琴日講吓，就係因為冇收過禮物，所以有嘢好講！不過我唔係因為冇人送禮物俾我而覺得慘，人大咗反而唔會咁著重禮物呢樣嘢，朋友同我食餐飯，講句生日快樂，都已經開心到震！今個生日好想得到，等咗好耐亦講咗好耐要買嘅單鏡反光機，終於揾到個藉口俾自己去行動，就係買俾自己做生日禮物。近兩個月都有留意各大牌子嘅相機性能同比較，加上徵詢咗朋友嘅意見，結果今日收工拿拿林去買起佢~ Sony A350嘅body再加一支Tamron A16，呵呵，開心到爆，由中學時代攞我老豆部菲林單鏡反光機同同學周圍影，到出嚟做嘢自己買部Sony DC -P5，再進化買Panasonic DC FX50，繼而再高級少少買部Ricoh GX200用嚟旁身，随時攞出嚟影，令我對攝影呢門學問結下不解之緣，小女子就响各方好友鼓勵下，再加埋自己追求滿足感嘅駒使下收養咗部DSLR，成為一個亂影一通卻偶然拍到一張精彩靚相嘅扮攝影師！哈哈！可喜可賀...下面張相就係我部A350嘅第一張作品喇！