B仔日記

今日我要介紹吓我嘅新朋友B仔~B仔身世好可憐...某日Alfree兩公婆揸車經過青山道附近見到B仔一隻狗仔On dog dog咁响條街遊蕩,佢哋驚佢周圍中中咗出馬路俾車車親，跟住佢哋揸返架車返轉頭睇佢,可能因為佢唔似係一隻流浪狗，所以佢哋唸住佢係走失咗，將佢送咗去愛護動物協會等佢主人返嚟帶佢返屋企。Alfree之後打去問B仔嘅下落，點知係仲未有人認返佢，最後搞咗好多手續領養咗佢帶返屋企,俾咗一個好舒適嘅家佢！B仔好乖o架,唔會吠人亦唔會亂吠,最愛乾淨,點搞佢都唔反抗,佢開心嗰陣奔奔跳個樣最搞笑!今日同佢玩得好開心，不過post咗啲相上FB之後，我好唔開心，有人竟然話如果係隻唐狗仔，咁會唔會帶返屋企？呢個答案我唔知，亦都冇人會知，但係咁樣講會唔會令人覺得係話緊我朋友都係貪隻狗仔得意同埋係史納莎至會有咁嘅行徑呢？我朋友係有愛心嘅人，心地極好，佢都係一心想幫隻狗仔揾返主人，而且佢從來冇養過狗，佢個人亦有潔僻，依家佢肯花錢、時間同心機响B仔度，我覺得唔會係你唸嘅意思囉！随口講又好有心講又好，唔好小人之心度君子之福呀！人有感情動物亦有，Alfree話同B仔嘅相遇係一種緣份，B仔依家有個安樂窩，希望佢健康快樂啦！亦都好多謝各好友對B仔嘅祝福！