今日真係天公造美啦，天清氣朗，太陽高掛！最適合一家大細去嗰度玩！冇得一齊掘蛋，睇住啲小朋友玩都好搞笑，有啲狂掘,有啲企响度唔知做乜,有啲向度了吓了吓一隻蛋都揾唔到...塲邊啲家長响度狂嗌自己啲小朋友快啲掘...總之一個亂字...不過勝在無限Fun Fun Fun!除咗有尋蛋比賽之外，仲有個Fun Fair俾小朋友玩個夠，小朋友真係開心到不得了！
之後，Tracy仲同我走咗一轉坪洲，响我記憶中，我呢生人應該去過一次咁大把！由愉景灣坐街渡過去大概十分鐘船程，坪洲的確好細，亦冇乜特別景點，所以好快就行咗一轉，去買菜返愉景灣咯！一落船就見到我好精靈嘅表弟同舅母啲兄弟姊妹過坪洲食飯，又會响度遇到真有緣！好在Simon有架Golf Car，所以落船佢就嚟車我哋走咗一轉遊艇會，睇吓啲船屋，Simon話啲遊艇有摩打，只係用嚟當屋住，嘩，的確寫意囉，啱晒退休呀！我哋買好餸就上Tracy屋企，由Simon操刀煮飯俾我哋食，簡簡單單三餸一湯，超正！
好多謝Tracy帶我遊咗一日，介紹咗個咁精彩嘅節目俾我，期待出年嘅「沙灘獵蛋奇兵」...
後記：我post咗啲相上FB後，好多朋友都話我做乜唔叫埋佢哋去！？好好好...出年決定搞個獵蛋團，一齊去獵蛋...我幫你哋影相...哈哈！
