响搬office之前，大家都話要摘個好時辰搬，又話要買香燭拜四角！？仲話要買隻燒豬冲一冲喜！唔係掛？咁大陣象，好難搞啫！所以我老細決定搞個入伙酒咁喎，亦即係琴日我响屋企搞搞震準備嘅food party。有專人睇咗通勝話上晝九點至十一點搬屋就最好，所以我哋人人搬屋，拿拿林搬晒過去新Office嗰邊~即係隔離房咁遠！首先想介紹一吓新office嘅佈局，就係一個字~細，同埋仲要同JATS Training & HR's 僱員關係組Share，冇晒私隱，最慘就係不見天日，但最好不過就係近住個Pantry，整嘢食都方便啲。而今日最大嘅節目，除咗搬屋之外，就係食食食。我啲朋友成日問我，點解我返工可以成日整嘢食，又成日影相好似唔駛點做，無他嘅，一來時間安排得好，二來影相係留住美好嘅一刻，三來因為我係小管家，大家做嘢咁辛苦，梗係要慰勞吓大家啦......其實我好忙！
今次food party除咗我整嘅home made食物之外，仲派專人响唔知邊度買咗隻大燒鵝，又响T4訂咗燒肉、油雞，加埋由專人特製嘅愛心西米露，嘩，成枱都係嘢食就最開心！有同事話我唔係隨便整嘢同買嘢俾人食，話我淨係整俾鐘意嘅人食!佢講得啱，的確係~所以有一日如果我請你食嘢嘅時候，唔好拒絕我呀！我會好傷心！
