講開食，今晚又有得食，就係同Davy,Connie同LimLim相約去到尖沙咀妹記大牌檔食飯，佢哋話好耐冇見過我喎！咁又係嘅，打開facebook可以成日見到我，真正見面就難啲！雖然大家都响機塲返工，唔好以為成日都會遇見，其實幾個月都可能唔見一次。咁難得約好，梗係要準時啦，點知最準時嗰個得我一個，全部都係遲到大王嚟！食飯前要我先罰企三十分鐘幫助消化，哈！你哋真係體貼，好彩我等得啫，第二個發咗顛都似！話時話好久以前都想試吓呢間大排檔，無奈有緣無份，今次終於可以品嘗一吓！基本上菜式係一流，平凡中又帶點不平凡，最愛就係嗰碟鬼馬油炸鬼，即係油炸鬼上中間釀咗墨魚肉，超正！仲有我最鐘意嘅炸墨魚咀，唔推介都唔得！過食大排檔呢家嘢，最好有四個或以上人數去食，可以叫多啲嘢食嘛！飯後餘慶就係去咗唱K，啱啱幾日前至講開唱K，今晚就有得唱，真好~仲唱埋〝三十日〞添，開心晒...
下次唔知會帶我去邊度食好嘢呢？
仲有幾時帶我去打鼓呢？
喂，老師要學多啲嘢，感受吓多啲新事物呢！
