由正式鑽波打保齡球到依家，唔經唔覺都打咗三年波，假假地都跟過吓名師學波，參加過三屆聯賽，假假地鯭車邊其中兩屆都攞過吓獎，都算係叫做交到功課。近年來，自覺懶散咗好多，以前一星期至少打兩三日，依家淨係星期一晚比賽前，早啲去練習練習，就係咁多。所以令我最自豪嘅就係我冇進步過，係咪有啲神經？我嘅Average分數，可以keep住咁低，等對手可以讓我多啲分，著數啲，呢個都係攻略之一。簡單啲嚟講，我自稱為秘密武器，哈！真係有啲阿Q精神！由於賽事非常緊張，我Team個隊長(以下稱之Daddy)，要我加緊操練，唔係叫我自己練，而係約定我陪我練，多好。所以上個星期六，本身已經病病哋嘅我，唔敢放飛機，乖乖地去練波，點知飯都唔食一打就打咗十二局，有冇進步？！真係見仁見智，個人而言~~係冇嘅！所以見到Daddy失望嘅眼神，真係有啲慚愧。今日收工拿拿林打俾Daddy早啲去練波，事關今晚對住我哋嘅宿敵(上屆嘅冠軍，我哋亞軍)，當然嚴陣以待！結果點呢？同呢篇Blog嘅名一樣，亦係同我哋Team個名一樣，叫做華麗~Gorgeous，全晚最多可以攞46分，我哋攞咗44分，咁你話係咪超勁呢?今晚出咗我、仔仔同國仔出戰，我哋三個好似食咗藥咁，打出超水準，我同國仔都分別補到個分瓶(Split)，如圖示:
------ 7 8 9 10 ------
-------- 4 5 6 --------
--------- 2 3 ----------
----------- 1 -----------
我就補咗個6、7，國仔補咗個6、7、10，得到眾人掌聲，感覺真係有啲飄飄然，皆因好耐都冇試過打得咁精采！今晚終於還得神落，亦都冇辜負Daddy對我哋嘅期望，交足功課啦！仲有至少二十週要打，所以成功與否，未免言之過早！唯有努力練習再戰下一回啦！
P.S. 查實今晚打波真係好有Heart去打，至少有觀眾睇得出吖！多謝你哋嘅掌聲呢！超興奮~亦係近期少有的興奮！
