今次係我哋攝影學會繼上次走到香港最南嘅下一站延續~向最東走...唔係東涌唔係東龍島，而係東坪洲！成日都想去，但係唔係咁易去到，事關星期六、日同公眾假期至有船去，行程需時個半鐘，話遠都叫做遠喇！其實呢個活動一早响三個月前已經開始籌備(好似好大陣象咁，其實只係request一齊放假之嘛！)今個禮拜初有個風打到嚟，仲掛埋八號風球，一直都好擔心今日會唔會落雨，點知天公造美，旅程開始有太陽有藍天有白雲，開心到暈。Colin仲帶埋佢隻小狗狗~豆豆一齊嚟添！仲有Venus都同我一樣買咗部GX200，真有眼光呢！
船差到東坪洲，啲黑雲慢慢飄近，睇怕真係會落雨！基本上落雨我哋都會照行，點都影返啲相返嚟交差吖！東坪洲嘅景點全部都圍繞住海岸線，所以圍住個島行一個圈就已經睇晒要睇嘅嘢！落船後，我哋先到島上好出名嘅坪洲士多食返餐飽飽先，佢嗰度啲紅豆冰什果冰涼粉冰真係大杯夾抵食，我哋叫咗碟超正嘅椒鹽鮮魷，相比起响市區食嘅，好食得多多聲，不過最好食嘅當然係Tony為我哋準備嘅芝士火腿三文治啦，佢嘅細心確實令我感動！
食飽之後，我哋响路上遇上千軍萬馬~~就係成地都係黑色會咬人嘅大螞蟻，超恐怖！如果企响度唔郁嘅話，唔駛五分鐘你成身都會係螞蟻，所以我哋唯一可以做嘅就係狂奔！我哋去到島嘅另一面，嗰邊嘅海岸線大多都係頁岩組成，今個旅程最特別嘅就係每去到一個景點都先有太陽，俾我哋影餐飽之後，就落一塲大雨，真趣怪！還是天喜歡作弄人？
我哋繞島一周後，去到士多食好出名嘅山水豆腐花，的確係超水準嘅香滑味美！成個行程行咗大嘅四個鐘，全都幾乎係平路，一啲都唔辛苦。
其實香港都有好多好靚嘅地方，只不過我哋好少去發掘出嚟，有見及此，我哋呢個攝影學會，會定期搞活動，所以鐘意攝影嘅你，喜歡親近大自然嘅你，想join埋我哋一齊玩嘅你...全都歡迎！
要留意下一站~塔門...
P.S. 今日好似開懷一點，但其實又不覺得是開懷了~選擇從馬料水徒步走回家，用三十五分鐘走了平時只會踩單車經過嘅路，感覺截然不同...
