我老闆為咗慰勞我哋响上次鸚鵡嗰單事件簿，所以好〝闊卓〞咁俾咗成千銀Budget我搞個慰勞宴，當然唔會食鮑嵾翅肚啦，最好過嘅就係叫到會，本來唸住訂大家樂，有品質保証吖嘛，殊不知上網睇吓啲價錢，真係唔駛唸，唯有轉移目標去T4啦，攞個Menu睇吓個價，嘩!同大家樂一樣~咁貴，仲要唔係好食至慘嘛！最後俾我問到平時我哋叫Pizza同炸雞嗰間Pizza and Chicken,原來佢哋都有到會叫，價錢都好啱我哋嘅要求，只不過送唔到入Office，要派壯男出去攞。以往嘅Food Party，我嘅角色都係幫手食嗰個，記憶中都好似未試過搞，所以今次有少少少少壓力，就係驚唔夠食同食唔晒！係咪有啲茅盾呢？事關係咁二都要請埋我老闆上面兩個大老闆，所以唔可以失禮。結果點呢？所有到會出乎意料嘅好食，再加埋陳媽媽秘製雞翼同豬頭咁大個嘅新疆哈蜜瓜做美點双輝，簡直Perfect！兩個大老闆唔嚟，佢哋真係冇口福，不過最重要係佢哋嘅唔俾面，令我哋食得好開懷。雖然食剩咗都幾多嘢，不過夜更嘅同事幾乎全部清晒，真係好少有，下次再搞都要叫返Pizza & Chicken至得呢！順帶一提~今次搞完個food party之後，個Meeting Room就要拆喇，事關我哋Office要大裝修，Bay 24嘅Airside office會搬埋過30位，我哋個Office將會係依家meeting room嘅位置~細咗好多！
