一向都响保齡球塲見面嘅國仔，今日佢一行四個傻佬入嚟租單車踩入大美篤，點解會知？因為叫我一齊去踩囉！事關要返工，所以叫佢哋踩住等，佢哋去到大美篤我至返到屋企攞車，好彩今日一啲都唔曬仲有啲風，所以踩得好輕鬆。之前攞起咗放响車尾袋嘅急救用品，出門口前心血來潮放返落袋，踩踩吓真係大派用塲，事關見到個妹妹坐咗响路邊，擦損手腳，我就幫佢貼咗兩塊膠布，我唸佢都應該幾痛，不過佢老豆好似冇乜點理佢，咁都得？！所以我亦繼續我嘅旅程，不停站直踩大美篤，用咗一個鐘就到。去到四個傻佬已經飲飽食醉，咁遠踩入去點都要叫個下午茶食吓。坐咗一陣就走，因為佢哋要交車，四個傻佬都話要試吓我車，踩完個個都話正！只不過係一部好普通嘅摺車，你哋牛龜咁大唔啱你哋！佢哋話要買Road Bike話咗好耐，仲唔買又响度瓜瓜叫話坐到蘿柚痛，真麻煩！
