琴晚我個師傅又預咗我陪佢，都唔知點解佢公司咁多酒店房俾佢哋瞓，不過今次唔同嘅就係冇五佰蚊俾我哋去据扒，因為間房係佢同事俾佢用，所以我哋去咗食T2食壽司。平時好少會叫乜卷物卷，今次佢叫咗個板前乜卷(唔記得咗叫乜)，又幾好食喎，所以食過翻尋味，不過最好食嘅莫過於珍寶帶子壽司同海胆壽司，咬落去嗰種鮮味~唔識講有幾好食！總之就係正啦！我師傅好鬼錫我，有好嘢都會預埋我，今次佢叫我攞部notebook返嚟，攞咗隻Microsoft Office 2007家用版俾我裝，對於一個電腦盲嘅我，直覺話我知2007版點都好過我裝咗嘅2003版，要記住係原裝正版喎，絕對唔係老翻！唔好以為一間五星級嘅大酒店，有得無線上網，查實真係有，不過只係上到佢哋酒店個官方網，把鬼呀！所以有部notebook冇得上網就等於廢咗武功，唯有乖乖早啲瞓，因為我個師傅要我倒塌咁早六點起身陪佢落Coffee Shop食早餐，係我至會陪佢顛！食飽當然最好再睡一睡，事關返晏又request咗late check-out，唔瞓盡真係有啲浪費；殊不知我老闆十點幾打嚟叫我立刻返去，心唸你又知我响邊，話到就到，你估我係Rescue Team咩，返去做乜？咪返去做Check Sheet囉！Real Time就做得多，因為日日做，Check Sheet就响未轉System前成日做，真係玩我！返到去連製服都唔駛我換，真爽，不過最唔爽就係停做冇飯食，我老闆真好，成日都俾啲好嘢我做，做完check sheet仲要過去做返real time，認真充實。
