邊緣

今早如常上班，一切如昔，工作工作再工作，直到收到爸爸嘅來電，一切頓時改變了。爸爸話阿嫲又入咗醫院，醫生話情況唔係咁樂觀，病情好嚴重，要屋企人去見吓佢，我啲眼淚即刻湧咗出嚟，腦袋一片空白，旁邊嘅同事見到我咁，問我乜嘢事叫我唔好喊，我根本唔識答佢哋。結果佢哋知道乜嘢事叫我快啲去睇阿嫲...琴日去探阿嫲，我未行到埋去，佢已經指住我，我唸阿嫲仲認得我係邊個，幫佢剪指甲推佢落公園行餵佢食粥...冇唸過今日就變成咁樣。我返屋企同爸爸阿哥一齊去醫院，咁啱又係坐返我今朝返工嗰架車亦係同一個司機，佢問我咁快就收工？我話要趕返去睇阿嫲，佢好有心問我有冇事，我只係話唔係咁好，其實佢見到我眼睛都知，司機哥哥真係好有心，開得奇快，我坐呢架車半個鐘就返到屋企，可能佢知我趕掛。我覺得自己好冇用，淨係識喊，去到見到阿嫲，琴日同今日判若兩人，今日要吸氧氣吊鹽水吊葡萄糖水維持生命，眨眼也冇力氣。响大家都有心理準備嘅時候，我卻同呢個心理準備抗衡，我明知她離去比活著更好，心裡卻有十萬個唔捨得；我感覺到阿嫲好辛苦好辛苦，但係我唔知可以做啲乜，淨係識响佢耳邊叫"阿嫲、阿嫲"，阿哥平時好少講嘢，佢話我好淨係叫阿嫲，要同阿嫲講吓嘢，佢同阿嫲講叫佢唔好擔心，我哋個個都好好，叫佢放鬆啲休息多啲，仲話我未嫁叫阿嫲唔駛擔心我，我未嫁住！？阿哥你真得，我真係服咗你！今日阿嫲仍在生死邊緣徘徊，我見到佢用盡力氣去呼吸，眼淚又再偷偷落下，對不起，我的確不能面對，你湊大我你是我最親愛的阿嫲，我的確不想你離開，無奈始終也是無奈，也是身由己吧！好想有一個人响我身邊支持我，聽我講嘢，可惜... ...
今天開始，的確害怕爸爸打俾我嘅電話，我呢個外表剛强的小女人，其實一啲都唔剛強，強項就係喊~好冇用。我好驚，你又會知道嗎？
感謝同事們對我嘅體諒同安慰；感謝司機哥哥為我加油，載我回家；感謝姑娘對阿嫲嘅照顧；阿嫲，雖然我心痛，但別鬥氣，請不要太苦...
老人院裡一位婆婆口中永遠唸著一句~主祐平安，願我身邊認識不認識也平安。