攻陷

一年一度嘅中秋節又嚟，响唔知幾時開始就有餅店開始賣月餅卷，今日經過一個商塲，人人响度打蛇餅排隊攞月餅，聽個朋友講話想買盒大班冰皮月餅都買唔到，唔係掛，有冇咁好賣呀？行過去睇又真係樣樣都沽清，隨街十個人有九個都攞住月盒，自己都係一樣！返到屋企見到個窗台，有啲恐怖，因為已經被月餅團攻陷，你想食乜嘢款嘅月餅，我屋企都有，仲有盒冰皮月餅亦佔據咗我屋企個雪櫃，所以我將會首先摧毀去！點摧？媽咪唔食爸爸唔食我都少食，所以貢獻俾喜歡食冰皮嘅你，唔該晒！响呢度我代表我媽咪多謝你哋嘅心意，因為月餅將會成為我肚餓時又冇嘢好食時嘅良伴...直至清晒為止(睇怕都要一段時間)！啱啱過咗嘅星期一，我哋保齡球壇嘅靚太Alfree，親手整咗啲冰皮月餅攞嚟球塲同大家分享，真係好得，薄薄嘅冰皮包住朱古力同紅豆蓉嘅內層，正！