琴日晏晝，我哋MP小食部整咗五碗五香肉丁福麵，我老闆响我哋整好晒準備食之制，又話要食，你話係咪玩嘢吖，早又唔話要食，硬係要搞搞震冇幫襯！食飽飽洗完碗之際，親愛嘅郭Sir攞咗一大個巨型水晶梨出嚟，當然係大家一齊食啦！所以我將佢斬開32件，搞到好似好多咁，真係珍貴。食得興高采烈之際，老闆突然問我放幾點，跟住又話有個Assignment俾我做，心唸唔係掛，唔好又叫我計埋啲虛無飄渺嘅數好喎！點知原來係俾錢叫我買啲生菓返嚟俾大家過中秋！佢都算大手筆呀，大拿拿攞咗成舊水出嚟，實在感動。放工去到街市睇，嘩！啲生果貴到飛起，我哋十幾廿個人，點買都分唔到一人一個應節嘅水晶梨！唯有唸個辦法要人人食得開心，就係做個生菓拼盆喇！個老板娘真係熱情，呢樣又話靚嗰樣又話靚，心唸想買都冇用，我真係攞唔到咁重返公司喎！結果我以Over一半budget嘅價錢嚟買咗兩個超巨大水晶梨、兩個特大超甜南水梨、兩個應節楊桃同埋一大個超甜多汁嘅沙田柚(以上形容生菓嘅形容詞係老板娘話嘅，係唔係真係要食過至知！)任務完成三分一，今朝起身再切埋屋企半個哈蜜瓜，就收到我同事嘅電話叫我早啲返去食團年飯。出門口時，我老豆問駛唔駛幫我攞落巴士站，確實又真係好重，咁我梗係自己攞啦！太陽伯伯真係唔話得，一啲都冇偷懶，曬到我額頭兩粒暗瘡都幾乎爆，你話有幾熱吖陰功！
返到去好開心可以真空個Office，全人類一齊去食飯，事關個system要re-boot，全部要熄機真係做就咗我哋團年一齊開心吓！食飽飽返到Office，坐一陣就開始去整菓盆，我唸佢哋估唔到我會搞到咁，好似生果到會咁，全部去皮去核放落口就食得，唔食見到都開心！佢哋見到個菓盆個個都响度嘩嘩聲，如果我有時間雕埋朶花添都仲嚇到你哋目定口呆都似呀(講吓啫)！哈，見到佢哋食得咁開心，自己都好滿足呢！總算冇失禮我老闆，事關佢叫我做得好好睇睇，今次又俾個Perfect俾自己，都算交到功課啦！
話時話我最鐘意整嘢食同搞food party，唔好俾第二啲assignment俾我呀，知道冇？
