歡聚、一刻

响個幾禮拜前同兩個體藝嘅舊同學，唸住三個約出嚟聚一聚，點知講講吓話如揾多啲人出嚟見吓面啦，咁就响Facebook搞咗個event，請咗好幾個同學，回覆出席嘅都有七、八個話會嚟，到最後呢就剩返五個，因為其餘三個放咗飛機囉！不過都好人少啲傾計易啲！都係一個好處，至於落腳點我就選擇咗一間我哋冇人去過嘅火煱放題店，叫寶哥味館，係响Open Rice度揾出嚟，睇過吓啲食評都OK，所以就揀咗佢。基本上我哋係食宵夜任飲任食火煱(啤酒唔包)，除咗火煱滾滾吓之外，仲有塊小小鐵板燒，一個價錢兩種食法，至於食物方面，價錢同質素可以話成正比，嗰度推介嘅M9和牛(M9係何解??我唔係好知喎!)，要另外加錢叫，我哋嗌咗一碟，賣相非常好，食落都OK，過唔知係咪真係和牛，姑且信佢係，咁個心會覺得佢抵啲！

入返正題，成十幾年冇見嘅阿肥，個樣冇乜點變，只係身形吹大咗三倍，摔佢個肚腩就最得意，同佢一齊影相，覺得自己瘦啲！哈，自欺欺人...佢同以前一樣，仲係鐘情於排球，日打夜打打極都咁肥，證明做運動唔一定會瘦！不過佢好醒，依家打沙灘排球，勝在唔駛點跳！輪到阿羅雲士，對上一次見佢係三、四個月前，都係一樣，成日都話要做到通頂，皆因太勤力？！係掛！？可能佢嗰行係咁啦，通常我同佢都會响MSN傾兩句。至於阿徐，佢曾經同我一齊去台灣遊學咗一年，鐘情於理論同講耶穌，滿懷大志，有好多意念，話題可以滔滔不絕，佢家吓响理大做行政方面嘅工作，主理體育方面嘅嘢，想學啲乜，問佢就最好！最後就係大Vic，一個小小女人，已經做晒女人要做嘅嘢，令我佩服也令我擔心！佢話佢個女同佢講，Wing姨姨點解叫做Wing？因為Wing姨姨對手好似對翼咁囉！小朋友講嘢真趣怪！
我哋下次唸住去食Pizza，阿肥話超好食，咁要下次去食過至知咯！